पाल्पा, जेठ १८ ।
पाल्पाको तानसेनबाट रामपुर जाँदै गरेको बस दुर्घटना हुँदा मृत्यु हुनेको सङख्या १३ पुगेको छ ।
लु १ ख ९७५ नम्बरको यात्रुवाहक बस आज बिहान रम्भा गाउँपालिका–४, होमिनमा सडकबाट खसेर भएको दुर्घटना मृत्यु हुनै १३ जनाकै सनाखत भएको जिल्ला प्रहरी कार्यालय पाल्पाले जनाएको छ ।
मृत्यु हुनेमा विष्णुमान बज्राचार्य, उहाँका भाई सचिन बज्राचार्य, कृष्णमान शाक्य, क्षेत्रमान शाक्य, गीता बुढाथोकी, कमला कार्की, लोकप्रसाद ढकाल, दुर्गाबहादुर सारु, सुशील श्रेष्ठ, देवेन्द्र प्रधान, वसन्ती खाँड, दुर्गा श्रेष्ठ र कृष्ण्णबहादुर बोहरा रहेका छन् ।
सचिन र कमलाको उपचारका क्रममा अस्पतालमा मृत्यु भएको हो । मृत्यु हुनेमा कृष्णबहादुर बोहरा डिभिजन सहकारी पाल्पाका प्रमुख हुनुहुन्छ । घाइतेमध्ये १० जनाको युनाइटेड मिसन अस्पताल तानसेन र २ जनाको लुम्बिनी मेडिकल कलेज प्रभासमा उपचार भैरहेको छ ।
सदरमुकाम तानसेनबाट रामपुर भ्रमणका लागि जाँदै गरेको लक्ष्मी बचत तथा ऋण सहकारी संस्था तानसेनका सदस्य चढेको लु २ ख ९७५ नम्बरको बस दुर्घटनामा परेको हो ।
यसैबीच चितवनको राप्ती नगरपालिका–५ स्थित चौकीडाँडा नजिकै ग्रेडर दुर्घटना हुँदा चालकको मृत्यु भएको छ । मृत्यु हुनेमा चालक चितवन खैरहनीका प्रेमबहादुर थापा रहेको जिल्ला प्रहरी कार्यालय चितवनले जनाएको छ ।
सडक सम्याउने क्रममा एक्कासि ग्रेडर सडकबाट ५० फिट तल खस्दा दुर्घटना भएको हो । दुर्घटनामा गम्भीर घाइते भएका थापाको उपचारका शिक्षण अस्पताल भरतपुरमा गएराति मृत्यु भएको प्रहरीले जनाएको छ ।
