वीराटनगर, १७ जेठ ।
करिब ३८ क्वीन्टल सुन तस्करी प्रकरणमा मुछिएका फरार अभियुक्त प्रहरी वरिष्ठ उपरीक्षक (एसएसपी) श्याम खत्रीले आत्मसमर्पण गरेका छन् ।
आज उनले जिल्ला अदालत, मोरङमा पुगेर आत्मसमर्पण गरेका हुन् । खत्रीको अन्तर्रा्ष्ट्रिय प्रहरी संगठन (इन्टरपोल)मा डिफ्यूजन नोटिस समेत जारी गरेर खोजी भईरहेको थियो ।
यसअद्दि पक्राउ परेका सुन काण्डका मुख्य अभियुक्त चुडामणि उप्रेती ‘गोरे’ ले खत्री विमानस्थलमा रहँदादेखि एक किलो सुन पास गराउँदा ५० हजार लिने गरेको बयान दिएका थिए ।
उनले खत्रीसँग सेटिङ मिलाउने कार्य आफुले नगरेर छिरिङ वालेङ घलले गर्ने गरेको बयान दिएका छन् ।
गोरेले सुन तस्करीमा सघाउने प्रहरीलाई बुझाएको रकमको लिस्टमा खत्रीको पनि नाम छ । उनले पटकपटक गरेर १ करोड १२ लाख रकम लिएको भेटिएको थियो भने तस्करीमा संलग्न अन्य अभियुक्तले पनि उनको नाम लिएका छन् ।
यसअघि पनि दुबईबाट आएको ३४ किलो सुन काण्डमा खत्री पक्राउ परेका थिए । तर, उनलाई पछि अदालतले सफाई दिएको थियो ।
खत्रीले आत्मासमर्पण गरेसँगै उनको बयानले सुन तस्करी प्रकरणको माथिल्लो जालो खुल्न सक्ने अनुमान गरिएको छ ।
