काठमाण्डौ, १७ जेठ ।
गृहमन्त्री रामबहादुर थापा बादलले निर्माणको जिम्मा लिने तर समयमै काम नसक्ने ठेकेदारहरुको नाम र फोटो सन्चार माध्यमबाट सार्वजनिक गर्न पत्रकारहरुलाई आह्वान गर्नुभएको छ ।
चितवनको सौराहामा आज नेपाल फोटो पत्रकार महासंघको पहिलो राष्ट्रिय भेलालाई उदघाटन गर्दै उहाँले विकास गर्छु भनेर ठेक्का लिने तर समयमा काम नसक्नेहरु मुलुकको समृद्धिका लागि बाधक रहेको बताउनु भयो ।
गृहमन्त्री थापाले विकास र समृद्धिको पक्षमा इमान्दारीपूर्वक काम गर्ने ठेकेदारहरुलाई भने नायकको रुपमा अगाडि ल्याउन आवश्यक भएको बताउनु भयो । त्यस्ता ठेकेदारहरुलाई सरकारले आवश्यक सहयोग पनि गर्ने गृहमन्त्री थापाको भनाइ छ ।
तस्कर र भ्रष्टाचारविरुद्ध कडारुपमा प्रस्तुत हुने संकेत गर्दै उहाले श्रम नगरी अकुत सम्पती आर्जन गर्ने र सरकारको रकम दुरुपयोग गर्नेहरु विकासको बाधक भएको टिपपणी गर्नुभयो ।
अहिले पनि देशमा अस्थिरता ल्याउने, नेपाली जनताको शान्तिको चाहनालाई खलबलाउने काम भैरहेको भन्दै उनीहरुविरुद्ध सरकारले कदम उठाउने थापाले चेतावनी दिनुभयो । तस्बिर: नारायण ढुंगाना
