काठमाडौँ, १५ जेठ
नेपाल विद्यार्थी संघले हत्याको आरोपमा जेल सजाय भोगेका बालकृष्ण ढुंगेललाई सरकारले आममाफी दिएको भन्दै आज कपडा खोलेर (अर्धनग्न) प्रदर्शन गरेको छ ।
नेविसंघले उज्जनकुमार श्रेष्ठको हत्यामा संलग्न भएको आरोपमा जेल सजाय भोगिरहेका पूर्वसभासद् ढुंगेललाई आममाफी दिएको विरोधमा अर्धनग्न प्रदर्शन गरेको हो ।
प्रदर्शनमा नेविसंघका अध्यक्ष नैनसिंह महरले वर्तमान सरकार अधिनायकवादतर्फ लागेको आरोप समेत लगाउनुभयो । अध्यक्ष नैनसिंह महरका अनुसार शंकरदेव क्याम्पस अगाडिबाट नेता कार्यकर्ताले अर्धनग्न भएर विरोध प्रदर्शन गरेका हुन्। प्रदर्शनले पुतलीसडक, बागबजार परिक्रमा गरेको छ।
उनीहरुले ‘हत्यारा छोड्न पाइँदैन, ओली सरकार चाँहिदैन, कम्युनिष्ट सर्वसत्ताबाद देखियो, न्यायको घाँटी रेटियो’ लगायत नारा लगाएका थिए।
नेविसंघका अध्यक्ष महरले ढुंगेलको रिहाइले कानूनी राज्यको उपहास भएको बताए। ‘मान्छे मार्नेलाई सरकारले छोड्दै जाने हो भने कानुनको औचित्य के ?’, महरले भने, ‘देशलाई अस्तव्यस्त बनाउने खालका क्रियाकलाप कदापी स्वीकार्य हुँदैन।’
आइतबार मन्त्रिपरिषद्को बैठकले ढुंगेलसहित ८१६ जनालाई आममाफी दिन राष्ट्रपतिसमक्ष सिफारिश गरेको थियो ।
