काठमाडौं, जेठ १५ ।
प्रतिपक्षी दल नेपाली कांग्रेसले कारागारमा रहेका बालकृष्ण ढुंगेलको कैद माफी–मिनाहाको निर्णय फिर्ता लिन संसदमार्फत् सरकारको ध्यानाकर्षण गराएको छ ।
संघीय संसदको आजको बैठक प्रारम्भमै कांग्रेसका सबै सांसदहरु आफ्नो आशनबाट उठेर विरोध जनाएपछि सभामुख कृष्णबहादुर महराले सांसद गगन थापालाई बोल्न समय दिनुभएको थियो ।
सांसद थापाले ढुंगेल व्यक्ति हत्याका आरोपमा सर्वोच्च अदालतबाट फैसला भइ थुनामा परेका हुनाले सो मुद्दालाई सत्यनिरुपण तथा मेलमिलाप आयोगको दायरामा ल्याएर हेर्न नमिल्ने जिकिर गर्नुभयो ।
थापाले सरकारले ढुंगेलको चालचलन सुध्रिएको भनेर विगतमा राजाले माफी दिएझैं वर्तमान प्रधानमन्त्रीलाई त्यो सुविधा नभएको भन्दै यस्तो निर्णय फिर्ता लिनुपर्ने बताउनु भयो ।
काग्रेसको उक्त बिरोध पश्चात् मात्रै बैठक चालू भइ अर्थमन्त्रीले बजेट प्रस्तुत् गर्नुभएको थियो ।
तत्कालीन नेकपा माओवादी केन्द्रका पूर्वसांसद ढुंगेललाई गणतन्त्र दिवसका अवसरमा नेपाल सरकारको सिफारिसमा राष्ट्रपतिले कैद मिनाहा गरेपछि उनी आजै डिल्लीबजार कारागरबाट रिहा हुनुभएको छ ।
