काठमाडौं, जेठ १५ ।
गणतन्त्र दिवसको अवसरमा आज तत्कालिन नेकपा माओवादी केन्द्रका नेता बालकृष्ण ढुंगेल रिहा हुनुभएको छ । असल चालचलन रहेको भन्दै सरकारको सिफारिसमा राष्ट्रपति विद्यादेवी भण्डारीले ढुंगेलसहितलाई कैदीबन्दीलाई आममाफी दिनुभएको हो ।
रिहा भएसँगै आज बिहान डिल्लीबजार कारागारबाट सीधै पेरिसडाँडास्थित तत्कालीन माओवादीको केन्द्रीय कार्यालय पुग्नुभएका ढुंगेलले सरकारको शासकीय प्रवृत्तिका कारण आफू जेल जानु परेको बताउनु भयो ।
पेरिसडाडामा आयोजित सभालाई सम्बोधन गर्दे गणतन्त्र विरोधी नै गणतन्त्रको मालिक बनेपछि आफू कारागार जानुपरेको बताउनु भयो ।
मुलुकमा गणतन्त्रको माग गर्दै आन्दोलन चलिरहेका बेला संकटकाल लगाउन, टाउकाको मूल्य तोक्ने र योद्धाहरुलाई बेपत्ता बनाउने काममा संलग्नहरु नै गणतन्त्र प्राप्तीपछि नेतृत्वमा पुगेकाले आफूमााथि अन्याय भएको उहाँको भनाई थियो ।
उहाँले भन्नुभयो, ‘मैले गणतन्त्र माग्दै गर्दा, गणतन्त्र जिन्दावाद भन्दै गर्दा, मेरो हिटरमा पिसाब फेराएर किड्नी ड्यामेज गर्दिने शेरबहादुर देउवाजीहरु गणतन्त्र आइसकेपछि प्रधानमन्त्री बन्नुहोला र गणतन्त्रको मालिक बनेपछि फेरि मलाई अपराधीकरण गर्दे जेल पठाउनुहुन्छ होला भन्ने मैले त्यो हिरासतमा, त्यो मुर्छनामा कल्पना गरेको थिइनँ ।
गणतन्त्र स्थापना भएपछि हिसाब किताब हुन्छ, गणतन्त्र माग्दाखेरी टाउकाको मूल्य तोक्नेहरु, गणतन्त्र हेरेर पश्चातापको आँशु बगाउँछन् होला भन्ने थियो । पछि तिनै हिटरमा पिसाब फेराउनेहरु, गणतन्त्र माग्दा टाउकाको मोल तोक्नेहरु, संकटकाल घोषणा गर्नेहरु नै गणतन्त्रका मालिक बने उहाँले भन्नुभयो ।
ढुङगेलले भन्नुभयो, जब गणतन्त्र माग्दा संकटकाल घोषणा गर्ने र हिटरमा पिसाब फेराउने अनि नागार्जुनका जंगलमा लगेर योद्धाहरु बेपत्ता पार्नेहरु गणतन्त्रको मालिक बन्न पाएपछि बालकृष्ण ढुंगेल जानु थियो कारागार । म गएँ । र आज फेरि रिहा भएको छु ।”
उहाँले गणतन्त्रलाई ‘अपहरण’ गर्दै र न्यायालयलाई ‘बलात्कृत’ गरेर आफूलाई जेल हालिएको गरिएको दावी गर्नुभयो ।
उहाँले भन्नुभयो, ‘म बालकृष्ण ढुंगेल न्यायालयको बेन्चबाट बलात्कृत भएको पात्र हूँ ।’
त्यसअघि डिल्लीबजार कारागारबाट बाहिरिने क्रममा पत्रकार, वकिल र न्यायधिस एक थाल भातको निम्ति बिकेको बताउनु भएका ढुङगेलले उक्त सभालाई सम्बोधन गर्दै सञ्चार जगत, न्यायालय र वकिलहरुलाई ‘ब्राण्डेड रक्सी’ र ‘एक थाल भातका भतुवा’ को संज्ञा दिनुभयो ।
आफू अपराधी नभएको भन्दै ढुंगेलले ढिलै भए पनि सत्यको विजय भएको बताउनुभयो ।
ढुंगेललाई कैद सजाय मिनाहा नगर्न दावी गर्दे दायर गरिएको रिटमाथि सर्वोच्च अदालतमा बहस जारी छ । उक्त रिटमा सर्वोच्च अदालतले निर्णयको सक्कल फाइल मगाएकै दिन सरकारले ढुँगेललाई माफी दिने निर्णय गरेको थियो ।
ढुंगेललाई प्रहरीको कन्द्रीय अनुसन्धान ब्युरो सिआईबीको टोलीले गत कात्तिक १४ गते फक्राउ गरेको थियो । यसैबीच आजै ढुङगेल सहित ८ सय १६ जना कैदीलाई थुनामुक्त भएका छन् ।
