काठमाडौँ, १२ जेठ ।
उपत्यकाका नदी र चक्रपथ सफाइ गरी आज ३५ मेट्रिक टन फोहर व्यवस्थापन गरिएको छ ।
वाग्मती सफाइ महाअभियानको २६३औँ हप्तामा आज कोटेश्वर महादेवस्थान क्षेत्रमा सफाइ गरी पाँच मेट्रिक टन फोहर निकालिएको हो ।
गुह्येश्वरीमाथिको वाग्मती सफाइ अभियानको २२४औँ हप्तामा आज कोलमती खोलामा सफाई गरि एक मेट्रिक टन फोहर व्यवस्थापन गरिएको अभियन्ता उत्तम पुडासैनीले बताउनु भयो ।
सफाइमा अधिकार सम्पन्न वाग्मती समितिका अध्यक्ष नरेन्द्रराज बस्नेत र आयोजना प्रमुख आशीष घिमिरेसहितको सहभागीता थियो ।
आगामी शनिबार २२५औँ हप्ताको सफाइ वाग्मतीको मुहान क्षेत्र सुन्दरीजलमा गरिने अभियन्ता पुडासैनीले बताउनुभयो ।
रुद्रमती सफाइको २१८औँ हप्तामा रातोपुल–कालोपुल–सिफलसम्म जनचेतनामूलक सफाइ गरी एक मेट्रिक टन फोहर व्यवस्थापन गरिएको छ ।
विष्णुमती सफाइ अभियानको १९०औँ हप्तामा सिद्धेश्वर क्षेत्रमा जनचेतनामूलक कार्यक्रम सहित गरिएको सफाईबाट एक मेट्रिक टन फोहर निकालिएको छ ।
मनोहरा नदी सफाइको ६१औँ हप्तामा आज काठमाडौँ महानगरपालिका वडा नं ३२ स्थित जडीबुटी तरकारी बजार क्षेत्रमा सफाइ गरी एक मेट्रिक टन फोहर व्यवस्थापन गरिएको अभियन्ता चन्द्र दंगालले जानकारी दिनुभयो ।
उता, चक्रपथ सफाइको ५९औँ हप्तामा एयरपोर्टबाट सिनामंगलसम्म सफाइ गरि १८ मेट्रिक टन फोहर व्यवस्थापन गएिको छ ।
उपत्यका विकास प्राधिकरणले चक्रपथ सफाइ अभियानसँगै सडकको केन्द्रबिन्दुबाट दायाँबायाँ ३१÷३१ मिटर चौडाइमा बनेका संरचना हटाउन नापजाँच शुरु गरेको इञ्जिनियर देवेन्द्रप्रसाद साहुले जानकारी दिनुभयो । चक्रपथ आठ लेनमा बिस्तार गर्दा पुग्ने गरी नापजाँच भइरहेको उहाँले बताउनुभयो ।
सिनामंगल चोकमा लामो समयदेखि थुपारिएको फोहर आजको चक्रपथ सफाइका क्रममा उठाइएको पनि उहाँले बताउनु भयो ।
उपत्यकाका धेरै स्थानमा गरिएको सफाइको फोहर आज उठ्न सकेको छैन । सिस्डोलमा फोहर लैजान समस्या भएकाले फोहर सडकमै थुपार्न बाध्य हुनुपरेको सफाइ अभियानकर्मीको भनाइ छ ।
