काठमाडौं, जेठ ९ ।नेकपा (क्रान्तिकारी) माओवादीका नेता सीपी गजुरेलले नयाँ जनवादी क्रान्ति पूरा गर्न सशस्त्र जनविद्रोहको यात्रा सुरु भएको घोषणा गर्नुभएको छ ।
क्रान्तिकारी माओवादीको युवा संगठन क्रान्तिकारी युवा लिग, नेपाल १ नं. प्रदेशस्तरीय राजनैतिक तथा शारीरिक प्रशिक्षण कार्यक्रमको समापनलार्इ संवोधन गर्दै उहाँले आगोको झिल्कोलाई कम नसम्झन र आगोसँंग नखेल्न केपी–मोदी गठबन्धनलाई गजुरेलले चेतावनी दिनुभयो ।
केपी ओलीको राष्ट्रवाद र प्रचण्डको माओवाद जनताले राम्ररी बुझिसकेको गजुरेलको भनार्इ थियो ।
ओखलढुंगाको मोलुङ् गाउँपालिकाको प्राप्चामा क्रान्तिकारी माओवादीका महासचिव मोहन वैद्य ‘किरण’ले ५ जेष्ठमा एक समारोहका बीच उद्घाटन गर्नुभएको थियो ।
चार दिनसम्म निरन्तर चलेको प्रशिक्षण कार्यक्रममा महासचिव किरणले पार्टीको कार्यनीति र कार्यदिशाबारे, पोलिटव्युरो सदस्य बसन्तले दर्शन र वैज्ञानिक समाजवादबारे, अर्का पोलिटव्युरो सदस्य एसटीले राजनैतिक अर्थशास्त्रमा प्रशिक्षण दिनुभएको थियो ।
त्यसैगरी पार्टी स्थायी समिति सदस्य सीपी गजुरेलले अन्तर्राष्ट्रिय कम्युनिष्ट आन्दोलनबारे प्रशिक्षण दिएका थिए भने आदर्श, आकाश र रविनले विभिन्न विधामा शारीरिक प्रशिक्षण दिनुभयो ।
उक्त युवा प्रशिक्षण कार्यक्रममा १ नं. प्रदेशका १४ जिल्लाबाट आएका युवा प्रतिनिधिहरु सहभागी भएका थिए ।
