काठमाडौं, जेठ ८ ।
साढे ३३ किलो सुन तस्करी प्रकरणका मुख्य नाइके चुडामणि उप्रेती ‘गोरे’ पक्राउ परेका छन् ।
सोही प्रकरणको अनुसन्धान गर्न गठित छानबिन समितिका एक उच्च अधिकारीले उनी पक्राउ परेको पुष्टि गरेका हुन् ।
यद्यपि, उनलाई कहाँबाट पक्राउ गरिएको हो भन्ने बारे भने खुलाइएको छैन । उनलाई पत्रकार सम्मेलन गरेर आजै सार्वजनिक गर्ने तयारी गरिएको छ ।
माघ अन्तिम साता यूएईबाट त्रिभुवन अन्तर्रा्ष्ट्रिय विमास्थल हुँदै आएको तस्करीको साढे ३३ केजी सुन सम्बन्धित व्यक्तिसम्म नपुगी गायब भएसँगै यो घटना सार्वजनिक भएको थियो । पछि भरिया उर्लाबारीका सनम शाक्यको हत्यासँगै सुन हराएको पुष्टि भएको थियो ।
घटनालाई लुकाउन प्रहरीले भूमिका खेलेको आरोप छ । यसबारे छानविनका क्रममा पूर्व डिआईजी गोविन्द निरौला, महानगरीय अपराध अनुसन्धान महाशाखाका प्रमख एसएसपी दिवेश लोहोनी, डीएसपी प्रजित केसीसहित ७ प्रहरी अधिकारी पक्राउ परेका छन् ।
एसएसपी श्याम खत्री अझै फरार छन् । घटनामा संलग्न ६३ जनाविरुद्ध जिल्ला अदालत, मोरङमा मुद्दा दर्ता भएको छ । यो मुद्दामा जिल्ला अदालत मोरङमा बहस जारी छ ।
घटनाको अनुसन्धान गर्न सरकारले गृहमन्त्रालयका सह(सचिव ईश्वर पौडेल नेतृत्वको छानबिन समिति बनाएको थियो ।
चर्चित साढे ३३ केजी सुन प्रकरणका मुख्य अभियुक्त मोरङ उर्लाबारीका चुडामणि उप्रेती ‘गोरे’ ‘गोल्ड डन’का नाममा पनि चिनिन्छन् ।
हाल उनका भाइ र श्रीमति दुवै यूएईमा छन् । उनका परिवारका अधिकांश सदस्य उर्लाबारीबाट हिँडिसकेका छन् ।
