७ जेठ,काठमाडौं । अखिल नेपाल क्रान्तिकारी ट्रेड यूनियन महासंघका अध्यक्ष अमर झाक्रीसहित ७ जना मजदूर नेता रिहा भएका छन् ।
काठमाडौैंको संवाद डबलीमा पत्रकार सम्मेलन सक्ने वितिक्कै गत वैशाख २५ गते गिरफ्तारमा परेकाअध्यक्ष झाक्रीसहित सचिव देव परियार, केन्द्रीय सदस्य, शिब परियार, शिशिर थापासहित सात जना रिहा भएका हुन् ।
सर्वोच्च अदालतको आदेशमा अाज दिउँसो उनीहरु काठमाडौंबाट रिहा भएका हुन् । महासंघको बैशाख १७ र १८ गते पोखरामा राष्ट्रिय सम्मेलन सम्पन्न भएको राष्ट्रिय सम्मेलनबारे जानकारी गराउन आयोजित पत्रकार सम्मेलनबाटै उनीहरुलाई प्रहरीले ११ जना मजदूर नेताहरुलाई गिरफ्तार गरेको थियो ।
केहीलाई सोही दिन नै छोडेपनि अध्यक्ष झाक्रीसहितका नेताहरुलाई सार्वजनिक अपराध अन्तरगत मुद्दा चलाएको थियो । उनीहरुलाई भारतीय प्रधानमन्त्री नरेन्द्र मोदीको नेपाल भ्रमणको पूर्वसन्ध्यामा गिरफ्तार गरिएको थियो ।
सोमबार सर्वोच्च न्यायधीस ओमप्रकाश मिश्र र प्रकाशमान सिंह राउतको इजलासले म्याद थप गरी थुनामा राख्नु गैरकानुनी भएको ठहर गर्दै तत्काल रिहाइको आदेश गरेको थियो ।
बन्दीहरुको तर्फबाट बरिष्ठ अधिबक्ता एकराज भन्डारी, कपीलचन्द्र पोख्रेल, अधिवक्ता कान्ती ढुंगानाले बहस गरेका थिए ।
