स्याङ्जा, जेष्ठ ५ ।
सामान्य प्रशासनमन्त्री लालबाबु पण्डितले खटाइएको ठाउँमा नजाने र कार्यसम्पादनमा अनियमितता गर्ने कर्मचारीलाई बिदा गर्न सरकारले कुनै कसर बाँकी नराख्ने चेतावनी दिनुभएको छ ।
जिल्ला समन्वय समितिको सभाहलमा आज आयोजित जिल्लाका सबै स्थानीय तहका प्रमुख, उपप्रमुख तथा प्रमुख प्रशासकीय अधिकृतसँगको भेटमा उहाले वर्तमान सरकार ५ वर्षसम्मको स्थायी भएकाले पुनः नौ महिनामा अर्को सरकार आउँछ र फाइदा लिउँला भन्ने मानसिकता हटाउन कर्मचारीलाई निर्देशन दिनुभएको छ ।
सरकारको तलब खाएर कामचोर प्रवृत्ति नदेखाउन पनि कर्मचारीलाई उहाले आग्रह गर्नुभएको छ । डिउटीको बेला ट्रेड युनियन भनेर नहिँड्नसमेत उहाले कर्मचारीलाई निर्देशन दिनुभएको छ ।
इमान्दारितापूर्वक आफ्नो जिम्मेवारी पूरा गर्दा आइपर्ने समस्याबारे नडराई काम गर्न र सीधैं आफूलाई फोन गरेर जानकारी गराउन पनि उहाले आग्रह गर्नुभएको छ ।
संघीयता र संविधानको सफलता र असफलता भन्ने जिम्मेवारी कर्मचारीसँग जोडिको भन्दै उहाले ‘जनप्रतिनिधिले नेतृत्व गरेकाले कर्मचारीलाई साथमा नलिइ राजनीतिक काम गर्न आग्रह गर्नुभएको छ ।
कार्यक्रममा अधिकांश जनप्रतिनिधिको प्रश्न कर्मचारी अभाव र नीति नियमको स्पष्ट खाका प्राप्त गर्न नसकेकोमा केन्द्रित थियो । मन्त्री पण्डितले उपत्यकाका ५ हजार कर्मचारीको दरबन्दी कटौती गरिएको र १० हजार कर्मचारी स्थानीय तहमा ल्याउने तयारी गरिएकाले असारबाट कर्मचारी अभावको समस्या आउन नदिने बताउनु भयो ।
