एजेन्सी ५ जेठ ।
क्युबाको राजधानी हवानामा भएको विमान दुर्घटनामा १ सय जनाभन्दा बढीको मृत्यु भएको छ ।
क्युवाको सरकारी विमान सेवा कम्पनीको बोइङ विमान हवानाको होजे मार्टी अन्तर्रा्ष्ट्रिय विमानस्थल नजिकै दुर्घटना भएको थियो ।
प्रत्यक्षदर्शीहरुका अनुसार उड्ने वित्तिकै विमानमा समस्या उत्पन्न भएको थियो । विमानमा चालक दलका सदस्यसहित १ सय १० जना बोकेर उडेको विमान विमानस्थल नजिकैको खेतमा जोतिन पुगेको थियो भने पछि आगो लागेको बताइएको छ ।
दुर्घटनामा घाइते भएका तीन जनाको उद्दार गरिएको छ । उनीहरुको अवस्था गम्भीर रहेको बताइएको छ । क्युबाको होलुगुइन शहरका लागि उडेको बोइङ ७३७ विमानमा रहेका अधिकांश यात्रु क्युबाकै नागरिक हुन् ।
यात्रु मध्ये पाँच जना भने विदेशी रहेको अधिकारीहरुले जनाएका छन् । चालक दलका ६ सदस्य भने मेक्सिकोका भएको बताइएको छ । क्युबाको एयरलाइन्सले दुर्घटनामा परेको विमान मेक्सिकोको कम्पनीसँग भाडामा लिएर सञ्चालन गरिरहेको थियो ।
क्यूबाली राष्ट्रपति मिगेल डियाज दुर्घटनास्थल पुगेर दुर्घटनाको छानबिन गर्न आदेश दिएका छन् । उनले दुर्घटनामा ज्यान गुमाउनेहरुको परिवारप्रति दुःख व्यक्त गरेका छन् ।
