काठमाडौं, जेठ ३। चलचित्र निर्माता माधव वाग्ले नक्कली नेपाली नोटसहित पक्राउ परेका छन् । महानगरीय प्रहरी परिसर काठमाडौंले साढे दुई करोडभन्दा बढी नक्कली नेपाली नोटसहित उनीसहित ६ जनालाई पक्राउ गरेको छ ।
पक्राउ पर्नेहरुमा चलचित्र निर्माता वाग्ले, महेन्द्र बोगटी, सुजित तामाङ, साजन तामाङ, प्रकाश सुवेदी र विवेक नापित रहेका छन् ।
प्रहरीले बुधबार पत्रकार सम्मेलन गरी उनीहरुसहित उनीहरुबाट बरामद गरिएको नक्कली नोट सार्वजनिक गरेको छ ।
यस्ता नक्कली नोटहरु होटल रेस्टुराँमा बिल तिर्ने, यौनकर्मीलाई दिने, जुवातास खेल्ने, लागुऔषध कारोबारमा लगाउने र सक्कलीमा मिसाएर बजारमा पुर्याउने गरिएको पनि प्रहरीको भनाइ छ ।
चलचित्र निर्माता वाग्लेले भने फिल्म सुटिङका लागि नक्कली नोट बनाएको दावी गरेका छन् । वाग्ले चलचित्र ‘लुट’, ‘छड्के’, ‘रेशम फिलिली’लगायतका निर्माता हुन् ।
गोंगबु, लुभु र बागबजारबाट यी नोट बरामद गरिएको पनि प्रहरीले जनाएको छ ।
