काठमाडौ १ जेठ ।
सुन तस्करी र सनम शाक्य हत्या मुद्दामा जिल्ला अदालत मोरङमा आज पनि प्रतिवादीतर्फका कानुन व्यवसायीहरुको बहस जारी रहने भएको छ ।
सरकारी वकिलहरुको थुनछेक बहस सकिएपछि प्रतिवादीका तर्फबाट बहस भइरहेको छ । यसअघि हिजो प्रतिवादी तर्फका वकिलहरुले थुनामा रहेका आरोपीलाई धरौटीमा रिहा गरी पुर्पक्ष गर्न माग गरेका छन् ।
प्रतिवादीका तर्फबाट वरिष्ठ अधिवक्ताहरु राजेन्द्र भट्टराई माधवराज आचार्य र सुरेशलाल श्रेष्ठसहित ६ जना कानून व्यवसायीले साधारण तारेखमा रिहा गरी पुर्पक्ष गर्न माग गरेका हुन् ।
कानुन व्यवसायीहरुले अभियुक्त विरुद्ध संगठित अपराध ऐन आकर्षित नहुने र तत्काल प्राप्त प्रमाणका आधारमा अभियोग पुष्टि नहुने भन्दै तस्करी भएको भनिएको सुन बरामत नभएकाले भन्सार चोरीपैठारी मुद्दा समेत स्थापित नहुने बताएका छन् ।
थुनछेक बहसका क्रममा सरकारी वकिलहरुले भने प्राप्त प्रमाणका आधारमा आरोपी सबै दोषी देखिएकाले थुनामा राखेर पुर्पक्ष गर्न माग गरेका थिए ।
