ओखलढुंगा, वैशाख ३० ।
सगरमाथा चुचुरो सम्म रोप फिक्सिङको कार्य सकिएसँगै यस वर्षको सगरमाथा आरोहणको लागि बाटो खुलेको छ ।
विभिन्न आरोहण कम्पनीमा आबद्ध आठ जना क्लाईम्बिङ शेर्पाहरुले आज डोरी टाँग्ने कार्य सम्पन्न गरेका छन् ।
सन् २०१८ को पहिलो आरोही दल बन्न सफल आठ जनाले आज अपरान्ह ३ बजेर ३० मिनेटमा सगरमाथाको चुचुरोमा पाइला टेकेका हुन् ।
डोरी टाँग्दै चुचुरामा पाईला टेक्नेहरुमा पासाङ तेन्जिङ शेर्पा, पासदावा शेर्पा, लाक्पादेन्डी शेर्पा, जेन्जेन लामा, सिद्धिबहादुर तामाङ, पेम्बाछिरि शेर्पा, तेन्जिङग्याल्जेन शेर्पा र दाटुक भोटे रहेका छन् ।
उनीहरुले चुचुरो सम्म पुगेर डोरी टाँग्ने काम सम्पन्न गरेको पर्यटन मन्त्रालयका प्रतिनिधि तथा आधार शिविरमा रहेका सम्पर्क अधिकृत ज्ञानेन्द्र श्रेष्ठले पुष्टि गर्नुभयो ।
अन्य आरोहीहरु समेत आरोहणको लागि तयारी अवस्थामा रहेको आरोहण दल सहित आधार शिविर पुगेका पिक प्रमोशन प्रालिका निर्देशक आङबाबु शेर्पाले बताउनुभयो ।
अन्य केही आरोहीले आइतबार राती सम्ममा आरोहण गर्न सक्ने अनुमान गरिएको छ । सगरमाथा आरोहणका लागि ३८ समूहको ३ सय ६४ आरोही छन् ।
अनुमति लिएका ३८ समूह मध्ये ४ समूह नेपाली आरोहीको छ । चार समूहमा जम्मा २० नेपाली आरोही छन् ।
