२८ वैशाख,जनकपुर । भारतीय प्रधानमन्त्री नरेन्द्र मोदी केही बेरमा जनकपुर पुग्दैछन् । पटनाबाट भारतीय सेनाको विशेष हेलिकोप्टरबाट उडिसकेका छन् ।
मोदीलाई हेर्न भन्दै विहानैबाट घुइँचो लागेको छ । अभिनन्दन गर्ने भनिएको स्थानमा सर्वसधारणको घइँचो लागेको छ । रंगभूमि मैदान प्रवेश गर्ने बाटो साँघुरो भएकै कारण ठेलमठेल भएको छ ।
केही व्यक्तिहरुले ठेलठाले गर्न थालेपछि प्रहरीले लाठी चार्ज गरेको छ । केही युवाहरुले प्रहरीको लाठी समेत खोस्ने कोशिष गरेपछि प्रहरीसँग सामान्य झडप भएको बताइएको छ ।
मोदीको भ्रमणका कारण विषेशगरि काठमाडौं र जनकपुरमा यातायात प्रभावित हुने भएको छ । जनकपुरको चक्रपथ भित्र गाडीलाई निषेध गरिएको छ । यस्तै, हेलमेट लगाएर मोटरसाइकल चलाउन पनि रोक लगाइएको ट्राफिक प्रहरीले जनाएको छ । जनकपुर विमानस्थलदेखि मुरलीचोक, रामानन्द चोक र जानकी मन्दिरसम्म गाडी मात्र होइन नागरिकलाई पैदल हिडडुल गर्न समेत दिइएको छैन ।
यस्तै मोदीको काठमाडौ भ्रमणका क्रममा शुक्रबार र शनिबार काठमाडौको ट्राफिक ब्यवस्थापन धेरै नै प्रभावित हुनेछ । काठमाडौको एयरपोर्ट, बौद्ध, गौशाला, टुंडिखेल, शितलनिवास, महाराजगञ्ज लगायत क्षेत्रको ट्राफिक प्रभावित हुने ट्राफिक प्रहरीले जनाएको छ । भ्रमणको समयमा यी ठाउँ र आसपासमा गाडी चल्न नदिइने हुँदा त्यसको प्रभाव काठमाडौका अरु ठाउँमा पनि पर्नेछ ।
