काठमाडौँ, २७ वैशाख ।
राष्ट्रियसभामा आजदेखि आर्थिक बर्ष ०७५÷७६ का लागि विनियोजन विधेयकका सिद्धान्त र प्राथमिकता (कर प्रस्तावबाहेक)सम्बन्धमा छलफल शुरु भएको छ ।
अर्थमन्त्री डा युवाराज खतिवडाले पेश गरेको विनियोजन विधेयकका सिद्धान्त र प्राथमिकताका सम्बन्धमा आज बाट सुरु भएको छलफलमा भाग लिर्दैँ बलरामप्रसाद बास्कोटाले प्रस्तावमा समावेश समृद्ध नेपाल र सुखी नेपालको लक्ष्य प्राप्त गर्ने मार्ग्चित्र सकारात्मक रहेको बताउनुभयो ।
सांसद राधेश्याम अघिकारीले अर्थमन्त्रीले प्रस्तुत गर्नुभएको स्वेतपत्रले आँकलन गरेजस्तो मुलुकको आर्थिक अवस्था नरहेको टिप्पणी गर्नुभयो ।
उहाँले शिक्षामा बजेट घट्नुका साथै सामुदायिक विद्यालयको गुणस्तर कायम गर्न र उच्च शिक्षा र अनुसन्धानको विषयमा विनियोजन विधेयकले नछुट्याएकोबारे स्पष्ट धारणा आउन आवश्यक रहेको बताउनु भयो ।
साथै उहाँले सुनकोशी कमला डायभर्सनका लागि बजेट ल्याइनुपर्नेमा जोड दिदैँ मानव संशाधनबारे अर्थमन्त्रीको स्पष्ट धारणा माग गर्नुभयो ।
सांसद जीवन बुढाले आर्थिक र समृद्धिका आधारले मूलभूत रुपमा बजेटका प्राथमिकताप्रति सहमत भए पनि दुर्गम र सुगमका लागि एउटै बास्केटमा हाल्ने प्रवृत्ति गलत भएको बताउनु भयो ।
उहाँले पहाड र दुर्गम क्षेत्रका नागरिकले बजेट र प्राथमिकता हेर्न तराई र शहरमा आउनु पर्ने अवस्था अन्त्य हुनुपर्ने भन्दै दुर्गम क्षेत्रका लागि आँकलन गरेको बजेट निकै थोरै भएको हुनाले वृद्धि गर्न आवश्यक रहेकोमा जोड दिनुभयो ।
सांसद रामप्रित पासवानले समाजवादी अर्थतन्त्रको खोलभित्र पूँजीवादी अर्थतन्त्रको परिकल्पना गर्नु नै त्रुटि रहेको बताउँदै वर्गीय र जातीय विभेदको समस्या समाधान नगरिकन विकास सम्भव नभएकाले विभेद र कुरीति निरुत्साहित गर्ने बजेट ल्याउन सुझाव दिनुभयो ।
उहाँले बाढीपीडितको समस्यालाई सम्बोधन गर्ने विषय बजेटमा समेटिन आवश्यक रहेको बताउँदै प्राविधिक तथा स्वरोजगार शिक्षाका लागि पर्याप्त बजेट विनियोजन गर्न सुझाव दिनुभयो । राष्ट्रियसभाको बैठक जारी रहेको छ ।
