काठमाडौं, वैशाख २० । गएको फागुन २१ गते मात्रै दुई दिने नेपालको औपचारिक भ्रमणमा आएका पाकिस्तानी प्रधानमन्त्री अब्बासी फेरि नेपाल आउन लागेको खबरले सबैलाई आश्चर्यचकित पारेको छ ।
‘दुई दिने नेपाल भ्रमणका लागि प्रधानमन्त्री शाहिद खक्कान अब्बासी आज नेपाल प्रस्थान गर्दै भनेर पाकिस्तान सरकारको आधिकारिक ट्विटर ह्याण्डल गभर्मेन्ट अफ् पाकिस्तानबाट गरिएको ट्वीटले सबैलाई आश्चयमा पारेको हो ।
व्यापार, शिक्षा,पर्यटनलगायतका द्वीपक्षीय सम्बन्ध अझ विस्तारित र सुदृढ बनाउन पाकिस्तानी प्रधानमन्त्री नेपाल भ्रमणमा जान लागेको कुरा ट्वीटमा उल्लेख गरिएको छ ।
पाकिस्तानी सरकारको ट्वीटर ह्याण्डलबाट आज मात्रै साउदी अरबका उर्जामन्त्रीसँग प्रधानमन्त्री अब्बासीको इस्लामाबादमा भएको भेटवार्तालगायत थुप्रै पोस्ट भएका छन् । त्यसैले ट्वीट पोस्ट गर्ने क्रममा पुरानै ट्वीट रिपोस्ट भएको हुन सक्ने काठमाडौंमा रहेको पाकिस्तानी राजदूतावासले जनाएको छ ।
पाकिस्तानी प्रधानमन्त्री अब्बासीको दुई दिने भ्रमणमा नेपाल आउन लागेको भए नेपाललाई जानकारी हुनुपर्ने तर जानकारी नआएकाले यो पुरानै पोष्ट भएको परराष्ट्र मन्त्रालयका प्रवक्ता भरतराज पौडेलले बताउनुभयो ।
