सभापति शेरबहादुर देउवाले निर्वाचनमा पराजयको जिम्मेवारी लिन अस्वीकार गरेपछि नेपाली कांग्रेस लफडामा फसेको छ । जसका कारण जारी केन्द्रीय समितिको बैठक शनिबार बस्न सकेन ।
पार्टीको हारको जिम्मेवारी कसले लिने भन्नेबारे विवाद चर्किएपछि नेपाली कांग्रेस केन्द्रीय कार्यसमितिको औपचारिक बैठक शनिबार बस्न नसकेको हो ।
एक महिनादेखि जारी बैठकमा सभापति देउवाको रवैयाका कारण चुनावमा हार्नुपरेको बताउँदै त्यसको जिम्मेवारी र दोष सभापति देउवाले लिनुपर्ने बताएका थिए ।
बिहान ९ बजेका लागि बोलाइएको बैठक पार्टीको आन्तरिक तयारी भन्दै राति ८ बजेसम्म पनि बस्न नसकेको हो । केन्द्रीय समितिको अनौपचारिक बैठक जारी रहेको अवस्थामा बैठकका क्रममा उठेका विषयवस्तुलाई सम्बोधन गर्नेबारे शीर्ष नेता परामर्शमा जुटेका छन् ।
पार्टीका आन्तरिक विषयको सम्बोधन र आगामी कार्यक्रम तय गर्नका लागि केन्द्रीय समितिको अनौपचारिक बैठक बसिरहेको कांग्रेस प्रवक्ता विश्वप्रकाश शर्माले बताएका छन् ।
शनिबारको बैठकमा महामन्त्री शशांक कोइरालाले चुनावी समीक्षा र आगामी कार्यक्रमसहित लिखित प्रस्ताव पेश गर्ने र सभापति शेरबहादुर देउवाले जवाफ दिएपछि बैठक सक्ने कांग्रेसको तयारी थियो ।
