काठमाडौँ ६ वैशाख ।
नेपाल कम्युनिस्ट पार्टीका केन्द्रीय सदस्य देवनारायण शाहसहित चार जना नेतालाई आज बिहान प्रहरीले गिरफ्तार गरेको छ ।
पार्टीका केन्द्रीय सदस्य एवम् मधेशी मुक्ति मोर्चा नेपालका अध्यक्ष शाहसहित नेकपाका केन्द्रिय सल्लाहकार समिति सदस्य राम लखन महत्तो, धनुषा जिल्ला इन्चार्ज राजु कार्की र सहिद तथा बेपत्ता परिवार धनुषाका अध्यक्ष यादव कवारीलाई गिरफ्तार गरेको छ ।
आज बिहान करिब ८ बजे पूर्व सभासद समेत रहनु भएका केन्द्रीय सल्लाहकार राम लखन महत्तोको महेन्द्रनगर बजारस्थित घरबाट गिरफ्तार गरेको हो ।
पार्टी संगठनको विशेष कामले भेला भइरहेका समय नेताहरुलाई बिनाकारण प्रहरीले गिरफ्तार गरेको नेकपाले जनाएको छ ।
यसैबीच पूर्वी कमान्ड इन्चार्ज विरहीले विज्ञप्ति जारी गरी पक्राउ परेका नेता कार्यकतालाई बिना सर्त रिहाइ नगरे संघर्षको कार्यक्रम घोषणा गर्ने बताउनु भएको छ ।
