एजेन्सी, वैशाख ४ ।
भारतीय कांग्रेस पार्टीका अध्यक्ष राहुल गान्धीले प्रधानमन्त्री नरेन्द्र मोदी संसदमा उभिनबाट डराउने बताएका छन् ।
गान्धीले प्रधानमन्त्री मोदीलाई चुनौती दिँदै यदि उनलाई संसदमा १५ मिनेटमा बोल्न दिए प्रधानमन्त्री उठ्नै नसक्ने बताएका छन् ।
गान्धीले राफेल तथा नीरव मोदीले पञ्जाब नेसनल बैंकको ३० हजार करोड भारतीय रुपैयाँ लिएर भागेको विषयमा प्रधानमन्त्री मोदीले एक शब्द पनि नबोल्नु अनौठो भएको बताए ।
गान्धीले भने, ‘हाम्रो खल्तीबाट ५ सय र एक हजारका नोट निकालेर प्रधानमन्त्रीले नीरव मोदीको खल्तीमा राखिदिए ।’ गान्धीले अहिले भारतका कैयौं शहरमा देखिएको नगदको अभावले भारतकै बैंकिङ प्रणालीमा असर पुग्ने बताए ।
भारतमा अहिले नोटबन्दीका बेलामा जस्तै नगदको अभाव रहेको छ । कैयौं शहरमा एटीएममा पैसा छैन । कतिपय एटीएमबाट पैसा ननिकाले पनि खातावालाको मोबाइलमा पैसा झिकेको सन्देश गैरहेको छ । त्यति मात्रै होइन, इमेलबाट पनि पैसा निकालिएको सन्देश खातावालालाई गइरहेको छ ।
भारतीय अर्थमन्त्री अरुण जेटलीले केही क्षेत्रमा अचानक नगदको माग बढेकाले समस्या देखिएको र दुई–तीन दिनमै समस्या समाधान हुने बताएका छन् ।
