काठमाडौ २९ चैत्र ।
सेवाग्राहीसँग घुस लिएको आरोपमा जिल्ला नापी शाखा कार्यालय उदयपुरका प्रमुख श्यामबाबु प्रसाद साह पक्राउ परेका छन् ।
स्थानीय एक सेवाग्राहीबाट जग्गाको नक्सा परिवर्तन गरिदिने शर्तमा घुस लिएलगत्तै अख्तियारको टोलीले शाहलाई पक्राउ गरेको हो ।
आज बिहान अख्तियार दुरुपयोग अनुसन्धान आयोग क्षेत्रीय कार्यालय इटहरीको टोलीले साहलाई ५० हजार रुपैयाँ घुससहित पक्राउ गरेको अख्तियारले जनाएको छ ।
साहले त्रियुगा नगरपालिका–१० का एक सेवाग्राहीबाट जग्गाको नक्सा परिवर्तन गरिदिने शर्तमा रु दुई लाख घुस मागेको र पहिलो किस्ता स्वरुप पचास हजार रुपैयाँ दिएको सेवाग्राहीले बताएका छन् ।
साहले घुस लिनेबित्तिकै तत्कालै सेवाग्राहीले अख्तियारलाई खबर गरेपछि अख्तियारको टोली कार्यालय पुगेर जाँच गर्दा हाकिम साहको सिरानबाट रु ५० हजार बरामद गरेको पनि क्षेत्रीय अख्तियार प्रमुख प्रदीपकुमार कोइरालाले बताउनुभयो ।
यसभन्दा अघि पनि साहले सेवाग्राहीबाट पटक पटक घुस लिएको गुनासो बढ्न थालेपछि उनी अख्तियारको निगरानीमा रहँदै आएको बताइएको छ ।
