२९ चैत,काठमाडौँ । मुख्यमन्त्री लालबाबु राउतले कडा कानून नबनाए बलात्कारीलाई तह लगाउन नसकिने बताएका छन् ।
बलात्कारीलाई फाँसीको सजाय दिने कानूनी व्यवस्था नगरेसम्म महिला अस्मिताको सुरक्षा नहुने बताए ।
उनले भने, ‘फाँसीको कुरा उठाएर मैले संविधान र मानवअधिकारको खिलाफ गर्न खोजेको हैन, तर घटनाक्रमलाई हेर्दा बलात्कार जस्तो जघन्य अपराधलाई फाँसीको सजाय शिवाय केहीले तह लागाउन सक्दैन ।’ बलात्कारका घटना नरोकिनुको प्रमुख कारण फितलो कानुन भएको पनि बताए ।
मुख्यमन्त्री राउतले निर्वाचनपछि अपराधको ग्राफ बढ्नुको अर्को कारणमा अधिकारका लागि प्रदेश र संघीय सरकारबिच चलिरहेको द्वन्द्वको अवस्था भएको बताए ।
‘चुनावपछि प्रदेश सरकार गठन भयो तर अपराध नियन्त्रणका लागि प्रदेश मातहत न प्रहरी छ, न प्रशासन ।’ उनले भने, त्यही अधिकारविहीन प्रदेश सरकारले जनताको अपेक्षा बमोजिम सुरक्षा दिन नसकेको दाबी गरे ।
कार्यक्रममा छोरीको शिक्षामा जोड, महिला शिक्षाका लागि विशेष प्रकारको सुविधा राखिएको प्रदेश २ मा छोरी जन्मने वित्तिकै जीवन विमा गरिदिने सरकाले नीति ल्याएको राउतले बताए ।
‘मधेशमा छोरी ‘भार’ नहोउन् भनेर बीमाको नीति ल्याएका हौ, महिलालाई अगाडी नबढाए प्रदेशलाई १ नम्बर बनाउने अभियान अघि बढ्न सक्दैन ।’ त्यसैले म भन्छु बलात्कारीबिरुद्ध कडा कानून बन्नुपर्छ ।
अपराधीमा भय बढोस् महिलाले सुरक्षा महशुस गरुन् र प्रदेशको विकास निर्माणमा निर्भिकतासाथ लाग्ने बातावरण सृजना होस्’ उनले भने ।
