काठमाडौं, चैत्र २८ ।
नेपाल–भारत प्रबुद्ध व्यक्ति समुह ईपिजीको बैठकमा सहभागि हुन नेपाली टोली आज भारतको नयाँ दिल्ली प्रस्थान गरेको छ । भेषबहादुर थापा संयोजकत्वको टोली आज त्यस तर्फ प्रस्थान गरेको हो ।
भोली र पर्सी नयाँ दिल्लीमा बस्ने ईपिजीको आठौँ बैठकले हालसम्म भएका दुईपक्षीय समझदारीलाई अन्तिम रूप दिने तथा प्रतिवेदनमा उल्लेख गरिने बिषयको अन्तिम टुङ्गो लगाउनेछ ।
ईपिजी प्रतिवेदन लेखनको अन्तिम चरणमा पुगेकाले सम्भवत अर्को पटक बस्ने नवौं बैठकले त्यसलाई टुङ्गयाउने ईपिजीका सदस्य राजन भट्टराईले जानकारी दिनुभयो ।
प्रधानमन्त्रीको भारत भ्रमणले दुई मुलुकबीच विश्वासको वातावरण निर्माण भएकाले प्रतिवेदन तयार गर्न इपिजीलाई थप सहज भएको उहाँको भनाई छ । नेपाल भारतबीचका सबै खाले सन्धि सम्झौता पुनरावलोकनका लागि सुझाव दिन गठित ईपीजीको म्याद आगामी असार २० गते सकिँदैछ ।
अन्तिम समयसीमा अगावै प्रतिवेदन दुवै मुलुकको सरकारलाई बुझाउने गरी गृहकार्य तीब्र भइरहेको भट्टराईले जानकारी दिनुभयो । दुवै मुलुकका प्रधानमन्त्रीले ईपीजीले दिने प्रतिवेदन स्वीकार गर्ने बताएपछि टोलीले मस्यौदालाई अन्तिम रूप दिन लागेको हो ।
