वासिंटन, चैत २२ । सामाजिक सञ्जाल फेसबुकले ८ करोड ७० लाख फेसबुक प्रयोगकर्ताको डाटा चोरी भएको स्वीकार गरेको छ ।
फेसबुकका संस्थापक मार्क जुकरबर्गले ८ करोड ७० लाख व्यक्तिको डाटा चोरी भएको जानकारी दिएको बीबीसीले जनाएको छ ।
यसअघि क्रिस्टोफर बिलीले पाँच करोडको डाटा चोरी भएको खुलासा गरेका थिए । डाटा चोरी हुनेहरुमा ११ लाख बेलायती छन् ।
बीबीसीका अनुसार ‘दिस इज योर डिजिटल लाइफ’ भनिने प्रश्नोत्तर जडान गर्ने ३ लाख ५ हजार प्रयोगकर्ताको माध्यमबाट विवरणहरू चुहिएको फेसबुकको अनुमान छ । डाटा चोरी भएको खुलासा भएपछि फेसबुकको केही समयदेखि आलोचना हुँदै आएको छ ।
केही वर्षदेखि क्याम्ब्रिज एनालिटिकाले करोडौं ब्यक्तिको जानकारी जम्मा गरेको थियो । लण्डनमा रहेको कम्पनीले ती जानकारी डिलिट गरेको जनाएको छ ।
क्याम्ब्रिज एनालिटीकाको स्क्याण्डल सार्वजनिक हुने बित्तिकै फेसबुकका संस्थापक मार्क जुगरबर्गले कम्पनीबाट गल्ती भएको स्वीकार गर्दै यसको ब्यवस्थापन गर्ने आश्वासन समेत दिनुभएको थियो ।
