पर्सा, चैत्र २१ ।
विकास निर्माणसँग सम्बन्धित पर्सा जिल्लाका सरकारी कार्यालयहरुले विकास बजेटको ठूलो हिस्सा खर्च गर्न सकेका छैनन् ।
सडक, भवन, सिंचाई, खानेपानी जस्ता जनसरोकारका कार्यालयहरुले नै विकास बजेट खर्च गर्न नसकेका हुन् ।
सहरी विकास तथा भवन निर्माण डिभिजन कार्यालयले २ अर्ब २३ करोड ५६ लाख ९५ हजार रुपैयाँ बजेट मध्ये ६० करोड ८० लाख ६४ हजार रुपैयाँ मात्र खर्च भएको कोष तथा लेखा नियन्त्रण कार्यालय वीरगञ्जका कोष नियन्त्रक एवं सूचना अधिकृत नारायण बहादुर श्रेष्ठले जानकारी दिनुभयो ।
हुलाकी सडक योजना कार्यालयले सडक निर्माणका लागि आएको ३० करोड ८५ लाख रुपैयाँ मध्ये १२ करोड ८६ लाख रुपैयाँ मात्र खर्च गरेको छ । व्यापारीक मार्ग बिस्तार आयोजना वीरगञ्ज पथलैया सडक खण्डले ५७ करोड १० लाख ६५ हजार रुपैयाँ बजेट मध्ये ३७ करोड ४२ लाख रुपैयाँ मात्र खर्च गर्न सकेको छ ।
सिंचाई विकास डिभिजन कार्यालयले १२ करोड ७९ लाख रुपैयाँ मध्ये १ करोड ७० लाख रुपैयाँ मात्र खर्च गरेको छ ।
