२० चैत,सुर्खेत । नपढाएरै सेवा सुविधा बुझेको समाचार अाएपछि कर्णाली प्रदेशको मुख्यमन्त्री महेन्द्रबहादुर शाहीकी पत्नी चन्दा शाहीले राजिनामा दिएकी छन् ।
कालिकोटको पचाल झरनाको गाउँपालिकाको तिकुवास्थित कालिका आधारभूत विद्यालयकी शिक्षिका चन्दाले विगत चार वर्षदेखि नपढाएरै सेवा सुविधा लिइरहेको समाचार अनलाइन डबलीले प्रकाशित गरेको थियो । पूर्वजनमुक्ति सेनाका डिभिजन कमाण्डर तथा माओवादी केन्द्रका नेता शाही दोस्रो संविधान सभाको लागि कालिकोटमा निर्वाचित भएदेखि पत्नी चन्दा वर्षको एक पटक मात्रै हाजिर गर्न जाने गरेको सार्वजनिक भएको थियो ।
कालिकोटका जिल्ला शिक्षा अधिकारी विष्णु तिवारीले भने शिक्षिका चन्दाले विगत पाँच महिना पहिले राजिनामा दिइसकेको बताए । तिवारीले अनलाइन डबलीसँग कुरा गर्दै भने, ‘शिक्षिका चन्दाले पाँच पहिला पहिले दिएका राजिनामा स्वीकृत भइसकेको छ ।’
जिल्ला शिक्षा कार्यालयकै एक कर्मचारीका अनुसार चन्दाले समाचार अाएपछि राजिनामा दिएको बताए । उनले समाचारबाट परेको प्रभावबाट बच्न पुरानो मितिमा राजिनामा दिएको भनिएको हो ।
यदि पाँच जिशिअ तिवारीले भनेकै बेला चन्दा राजिनामा दिएको भएपनि त्यो भन्दा पहिलेसम्म नपढाएरै खाएको तलब फिर्ता गर्नु पर्दैन ।
यसैबीच
मुख्यमन्त्री शाहीका सालाले पत्रकार नरेश भण्डारीलाई धम्की दिनुको साथै सामाजिक संजालमा गाली बेइजत गरेका छन् । मुख्यमन्त्री शाहीकी श्रीमति चन्दा शाहीले नपढाएरै तलब खाएको समाचारलाई लिएर उनले धम्की दिनुको साथै सामाजिक संजाल फेसबुकमा जथाभावि गाली गरेका हुन् ।
मख्यमन्त्रीका साला लोकेन्द्र शाहीले फोन गरेर ठिक पार्ने धम्की दिनुको साथै सामाजिक संजालमा तल्लोस्तरको गाली बेइजती गरेका छन् । उद्यपी उनी शाही मुख्यमन्त्रीका अाफ्नै साला भने होइनन् । उनको घर हुम्ला हो भने मुख्यमन्त्री शाहीको ससुराली कालिकोट हो । तर, दिदी-भिनाजु भन्दै लामो समयदेखि उनी सँगै बसिरहेका छन् ।
नेपाल पत्रकार महासंघ जुम्ला शाखाका सदस्य भण्डारी जनमास मासिक पत्रिका र रारान्यूज डटकमका सम्पादक हुन् । भण्डारीले अाफ्नो सार्वजनिक रुपमा मानहानी भएको भन्दै प्रहरीमा उजुरी दिने तयारी गरेका छन् ।
‘समाचारको विषयमा चित्त नबुझे राज्यका सम्बन्धित निकायहरु छन्, त्यहाँ जानु पर्थ्यो तर सामाजिक संजलामा मेरो चरित्रहत्या गर्नेगरी अभिव्यक्त दिनु भएको छ, सम्बन्धित निकायमा जान्छु’ भण्डारीले भने । उनले नेपाल पत्रकार महासंघलाई पनि जानकारी गराएको बताए ।
लामो समयदेखि मुख्यमन्त्री शाहीसँगै बस्दै अाएका शाहीले फेसबुकमा ‘ठकुरीशाही कार्ल माक्स’ नामबाट फेसबुक चलाउँदै अाएका छन् । उनले पत्रकार भण्डारीको फोटोमा मानसिक सन्तुलन ठिक नभएको भन्दै सुधारकेन्द्रमा लिनुपर्ने लेखेका छन् । फेसबुकमा लेख्नुभन्दा पहिला शाहीले ९८६९५२०६१८ नम्बरबाट पत्रकार भण्डारीलाई फोन गरेर धक्मी समेत दिएका थिए ।
पत्रकार भण्डारी नेकपा माओवादी केन्द्र पत्रकार संगठन प्रेस सेन्टरका केन्द्रीय सदस्य समेत हुन् । सँगै बस्ने व्यक्तिले पार्टी निकट पत्रकारलाई धम्की दिनुको साथै सामाजिक संजालमा जथाभावि लेख्दा समेत चुप लागेर बसेको भन्दै माओवादी केन्द्रका नेताहरुले मुख्यन्त्री शाहीको अालोचना गरेका छन् ।–अनलाइन डबलीबाट
