काठमाडौ २० चैत्र ।
चीनले अमेरिकाबाट आयात हुने वस्तुको भन्सार शुल्क वृद्धि गरेकोमा अमेरिकाले आलोचना गरेको छ । ह्वाइट हाउसले विज्ञप्ति जारी गर्दै बेइजिङले विश्व बजार बिगारेको आरोप लगाएको छ ।
अमेरिकाले चीनबाट निर्यात गरिने सामग्रीमा भन्सार शुल्क बढाएपछि चीनले पनि यस्तो कदम चालेको अन्तर्राष्ट्रिय सन्चार माध्यमले जनाएका छन् ।
चीनले बंगुरको मासु, वाइन लगायतका १ सय २८ अमेरिकी बस्तुमा २५ प्रतिशतसम्म भन्सार शुल्क बढाएको जनाएको छ । अमेरिकी निर्णयपछि हुने असन्तुलन र आफ्नो हितलाई सुरक्षा प्रदान गर्न यस्तो कदम चालिएको चीनले जनाएको छ ।
चीनको निर्णयबाट अमेरिकालाई करिब ३ अर्ब डलर बराबरको नोक्सानी हुने अनुमान छ । अमेरिकी राष्ट्रपति डोनल्ड ट्रम्पले विदेशी स्टील र आल्मुनियममा कर बढाउने निर्णय गर्नुभएको थियो ।
चीनले अमेरिकासँग ब्यापार युद्ध नचाहे पनि आफ्नो अर्थतन्त्रमा असर परे चुप लागेर नबस्ने चेतावनी दिइसकेको छ ।
