काठमाडौ १७ चैत्र ।
भारतको एपोलो अस्पतालमा उपचारका क्रममा निधन हुनुभएका नेपाली काँग्रेसका नेता खुमबहादुर खड्काको पार्थिव शरीर आज राति काठमाडौँ ल्याइने भएको छ ।
खड्काको पार्थिव शरीर राति साढे १० बजे नयाँदिल्लीबाट काठमाडौँ आइपुग्ने नेपाली काँग्रेसका मुख्यसचिव कृष्णप्रसाद पौडेलले जानकारी दिनुभयो ।
उहाँका अनुसार खड्काको पार्थिव शरीर अन्तिम श्रद्धाञ्जलिका लागि भोली बिहान ९ बजे देखि दिउँसो १ बजेसम्म सानेपास्थित काँग्रेस केन्द्रीय कार्यालयमा राखिनेछ ।
त्यसपछि पशुपति आर्यघाटमा अन्तिम संस्कार गरिने बताईएको छ । मिर्गौला र छातीको संक्रमणबाट केही वर्षदेखि पीडित ६७ वर्षीय खड्काको शुक्रबार साँझ निधन भएको थियो ।
नेता खड्काको निधनका कारण कांग्रेसले तीन दिनसम्म कुनैपनि औपचारिक कार्यक्रम नगर्ने निर्णय गरेको छ । भोली बस्ने भनिएको केन्द्रीय कार्यसमितिको बैठक पनि स्थगित गरिएको प्रवक्ता विश्वप्रकाश शर्माले बताउनुभयो ।
