काठमाडौं ,चैत्र १७ ।
उपत्यकावासीले आगामी वैशाख १ गते भित्र पनि मेलम्चीको पानी पिउन नपाउने भएक छन् ।
तोकिएकै समयमा सुरुङ खन्ने कार्य सकिएपनि फिनिसिङको काम र पाइपलाइन विस्तार पूरा नभएकाले उपत्यका पानी आइपुग्न अझै ३ देखि ४ महिना लाग्ने मेलम्ची खानेपानी विकास समितिका सिनियर डिभिजन इञ्जिनियर एवं सूचना अधिकारी राजेन्द्र पन्त जानकारी दिनुभयो ।
बहुप्रतिक्षित मेलम्ची खानेपानी आयोजना अन्तर्गतको २७ दशमलब ५ किलोमिटरमध्ये अब ७५ मिटरमात्र सुरुङ खन्ने काम बाँकी छ । तोकिएकै मितिमा सुरुङ खनेर सकिएपनि पानी उपत्यकाबासीको घरघरमा पुर्याउन नसकिने उहाँले प्रष्ठ्याउनु भयो ।
साढे २७ किलोमिटर सुरुङमध्ये केही भागमा फिनिसिङको काम सुरु भएपनि कमजोर चट्टान भएको स्थानमा सुरुङ खन्नै समय लागेको र कामदारको हड्ताल तथा ठेकेदार कम्पनीको ढिलाईले आयोजना भनेकै समयमा सम्पन्न गर्न नसकेको पन्तले बताउनुभयो ।
सुरुङ निर्माण मात्रै सम्पन्न भएर उपत्यकामा पानी नआउने बताउँदै उहाँले सुरुङ निर्माण पछिको काममा समय लाग्ने भएकाले वैशाखभित्रै पानी आउने सम्भावना नभएको बताउनुभयो ।
खानेपानी मन्त्री बीना मगरले मन्त्रालय सम्हाले लगत्तै आयोजनाको स्थलगत भ्रमण गर्दै आगामी दशैं अगावै काठमाडौंमा मेलम्चीको खानेपानी र्पुयाउने प्रतिवद्धता व्यक्त गर्नुभएको थियो ।
सुरुङ खन्ने काम गरिरहेको इटलीको सिएसी कम्पनीले कार्यरत स्वदेशी र विदेशी कामदारलाई ३ महिनाको तलब नदिँदा उत्पन्न विवादले पनि सुरुङ निर्माणको काम प्रभावित भएको आयोजनाका प्रमुख कार्यकारी अधिकृत रामचन्द्र देवकोटाले बताउनु भयो ।
यद्यपी सो समस्या तत्कालका लागि टरेकोले हाल दैनिक २ सिफ्ट गरी ८ मिटरसम्म सुरुङ खन्ने काम भईरहेको उहाँको भनाई छ ।
यस हिसाबले पनि अबको २ साताभित्र सुरुङ खन्ने काम सम्पन्न भएपनि फिनिसिङको काम भने सम्पन्न नहुने भएकाले वैशाखभित्रै खानेपानी वितरणको काम नहुने भएको हो ।
