काठमाडौं, चैत १३ ।
शेयरबजार परिसूचक नेप्से मंगलबार ३९ अंकभन्दा धेरैले बढेको छ ।
हिजो झण्डै ५२ अंकले घटेको नेप्से आज ३९ दशमलव १६ अंकले बढेर १२ सय ८ बिन्दुको नजिकै पुगेको हो । नेप्से हिजो घटेर ११ सय ६८ दशमलव ५५ अङ्कमा ओर्लिएको थियो । आज बजार खुले लगत्तै ओरालो लागेको नेप्से केहीबेरपछि बढ्न थालेको थियो ।
आज वाणिज्य बाहेकका सबै समूह बढेको दिन सबैभन्दा धेरै बीमा समूह झण्डै २ सय ९४ अंकले बढेको छ । त्यस्तै होटल समूह १ सय २६ भन्दा बढी, लघुवित्त समूह साढे ५६, जलविद्युत समूह झण्डै ६२ र बैकिङ समूह ३३ भन्दा धेरैले बढेको छ ।
समग्र बजार बढे पनि वाणिज्य समूह भने मंगलबार ३ अंकभन्दा धेरैले घटेको छ । ५० करोडभन्दा धेरैको कारोबार भएको दिन आज सबैभन्दा धेरै नेपाल लाइफ इन्स्योरेनस कम्पनीको शेयर १० करोडभन्दा धेरैको किनबेच भएको नेपाल स्टक एक्सचेञ्जले जनाएको छ ।
आज एनएमबी माइक्रोफाइनान्सका लगानीकर्ताले १० प्रतिशत नाफा कमाएका छन् ।
