काठमाडौं, चैत्र ९ ।
कानुन व्यवसायीको छाता संगठन बार एसोसिएसनको १४ औ राष्ट्रिय सम्मेलन आजबाट नेपालगन्जमा सुरु हुँदै छ । तीन दिन सम्म सञ्चालन हुने सम्मेलनको राष्टपति विद्यादेवि भण्डारीले मध्यान्ह १२ बजे पछि उद्घाटन गर्ने कार्यक्रम रहेको छ ।
सम्मेलनको मुख्य नारा ‘स्वतन्त्र, निष्पक्ष, सक्षम न्यायपालिकाप्रति प्रतिबद्धता कानुन व्यवसायीको पेसागत दक्षता एवं सुनिश्चितता’ तय गरिएको छ ।
पूर्वप्रधानन्यायाधीश गोपाल पराजुलीको बहिर्गमनलाई लिएर मुलुकमा बहस चलिरहेका बेला बार एसोसिएसनले राष्टिय सम्मेलनको आयोजना गरेको हो । सम्मेलनमा स्वतन्त्र, निष्पक्ष र सक्षम न्यायपालिकाको मुद्दाले प्राथमिकता पाउने बताइएको छ ।
छलफलमा मुलुकभरका करिब ३ हजार कानुन व्यवसायी सहभागी हुने बताइएको छ । पूर्वप्रधानन्यायाधीश पराजुलीको जन्ममिति विवादबारे मौन बसेको भन्दै बारको चर्को आलोचना भइरहेको बेला बारले सम्मेलन गर्न लागेको हो ।
सम्मेलनमा १० वटा विषयमा प्यानल बनाएर छलफल गरी नेपालगन्ज घोषणापत्र समेत जारी गरिनेछ । कानुन व्यवसायलाई आत्मनिर्भर, व्यावसायिक, दक्ष र मर्या्दित एवं विश्वसनीय कसरी बनाउने, स्वतन्त्र न्यायपालिकाभित्र र बाहिर संवैधानिक संस्थाले गर्ने आक्रमणबाट न्यायपालिकालाई कसरी जोगाउने लगायत विषयमा छलफल हुनेछ ।
