७ चैत्र,काठमाडौँ । नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ ले नयाँ शक्ति नेपाल पार्टीका संयोजक डा. बाबुराम भट्टराई बौलाएको आरोप लगाएका छन् । उनले बाबुरामको नाम नलिएरै आफूले धेरै दुःख गरेर नेता बनाएको तर धेरै पढेर बौलाएका बताए ।
अध्यक्ष प्रचण्डले धेरै पढ्ने मान्छे धेरै नबुझ्ने हुने कुरा पुनः दोहोर्याएका छन् । केही दिन पहिला धेरै पढ्न नहुने भन्दै दिएको अभिव्यक्तिको चौतर्फी विरोध भएको थियो । ५३ औं अन्तर्राष्ट्रिय जातीय विभेद उन्मुलन दिवसको अवसरमा आयोजना गरिएको एक कार्यक्रमलाई सम्बोधन गर्दै प्रचण्डले धेरै पढेका मान्छेहरुमा अहंकार, अराजकता धेरै हुने बताए ।
“हाम्रो पार्टीमा पनि बल्ल बल्ल धेरै दुःख गरेर एउटा वुद्धिजीविलाई नेतृत्वमा र्पुयाएको थिएँ, उहाँले धेरै पढ्नुभयो र झण्डै झण्डै बौलाउनुभयो” प्रचण्डले भने । उनले पार्टीका अरु बुद्धिजीवि पनि बौलाउन लागेको बताए । लेनिनले बुद्धिजीविमा पाइने अहंकार, अराजकता र आत्मकेन्द्रीत व्यक्तिवादले आन्दोलनलाई बर्बाद पारेको बताउँने गरेको प्रचण्डले बताए ।
कार्यक्रममा प्रचण्डले अर्का नेता विश्वभक्त दुलाल ‘अहुती’लाई पनि विदेशीको हितमा काम गरेको आरोप लगाए । प्रचण्डले उनको पनि नामै नलिएर सन्दाखेरि क्रान्तिकारी तर व्यवहारमा साम्राज्यवादीलाई सहयोग गर्ने गतिविधि गर्ने गरेको आरोप लगाए ।
केही दिन पहिला प्रचण्डले बाबुरामलाई पार्टीमा फर्कन आग्रह गरेका थिए । त्यसको जवाफमा बाबुरामले प्रचण्डसँग एकता गर्न आफ्ना आँखा नफुटेको बताउँदै आएका थिए । बुधबारै एक कार्यक्रममा भट्टराईले प्रचण्डसँग सामान्य कार्यगत एकता पनि हुन नसक्ने बताएका छन् ।onlinedabali
