१० फागुन,दैलेख । दैलेख बजारबाट महाबु गाउँपालिकाको गैडावाजका लागि छुटेको बोलेरो जीप महाबु–४ ओखलढुंगामा दुर्घटना भएको छ।
चालसहित ९ जना सवार लु १ ज ३५३२ नम्बरको जीप दुर्घटना हुँदा चार जनाको मृत्यु भएको प्रहरीले बताएको छ । महाबु गाउँपालिका-४ की २२ वर्षीया निर्मला पाण्डे, सोह गाउँपालिका-५ का ३५ वर्षीय श्रम शाही र ६ निवासी २९ वर्षीया निर्मला शाही मृत्यु भएको छ । त्यस्तै सुर्खेत घर भएका तिलक ढकाल पनि मृत्यु भएको छ भने अन्य पाँच जना घाइते भएका छन् ।
प्रहरीका अनुसार जीप ब्रेक फेल भएर दुर्घटना भएको थियो ।
यसैबीच , प्रदेश नम्बर ६ का अान्तरिक मामिला तथा कानुनमन्त्री नरेश भण्डारीले दैलेख जीप दुर्घटनाको सत्यतथ्य छानविन गर्ने बताएका छन् ।
विहीबार साँझ दुर्घटनाबारे प्रतिक्रिया दिँदै मन्त्री भण्डारीले घटनाप्रति मन्त्रालयको गम्भीर ध्यानाकर्षण भएको बताउँदै भोलि नै समिति गठन गर्ने जानकारी दिएका छन् । मन्त्री भण्डारीले जीपमा सवार ४ जनाको घटनास्थमै मृत्यु भएको र ४ जनाको अवस्था गम्भीर भएको जानकारी दिँदै घटनास्थलमा प्रहरी टोली पुगेर उद्दार गरिरहेको बताए ।
मन्त्री भण्डारीले भने, ”अाज दैलेखमा भएकाे जीप दुर्घटनाले स्तब्ध बनाएकाे छ । सवार यात्रुहरूमध्ये ४ जनाकाे घटनास्थलमा मृत्यु भएकाे छ भने ४ जना गम्भीर घाइते भएका छन् । ड्राइभरकाे अवस्था सामान्य छ । घटनास्थलमा प्रहरी टाेली पुगेर घाइतेहरूकाे उद्दार गरिरहेकाे छ ।
याे दुर्घटनाप्रती प्रदेश नं. ६ काे अान्तरिक मामिला तथा कानुन मन्त्रालयकाे गम्भीर ध्यानाकर्षण भएकाे छ । घटनाकाे सत्य तथ्य छानविन गर्न भाेली एक समिति गठन गरिनेछ ।”
मन्त्री भण्डारीले घटनामा ज्यान गुमाउनेहरूप्रती श्रद्धाञ्जली र घाईतेहरूमा सिघ्र स्वास्थ्यलाभकाे कामना गरेका छन् ।
