काठमाडौं, ९ फागुन । नेपाल कम्युनिस्ट पार्टी निकट अखिल नेपाल भूमिहीन सुकुम्बासी संघले भूमाफियाबिरुद्ध जनकारबाही थाल्ने भएको छ ।
अखिल नेपाल भूमिहीन सुकुम्बासी संघको केन्द्रीय समितिको हालै सम्पन्न बैठकले सुकुम्बासीका जमिन बेचेर घरवारविहीन बनाउने भूमाफियामाथि जनकार्वाही गर्ने निर्णय गरेको हो ।
बैठकले देशव्यापी रुपमा सुकुम्बासीमाथि भएको ज्यादतीका विरुद्ध संघर्ष गर्ने निर्णय गरेको छ । सुकुम्बासी संघका केन्द्रीय अध्यक्ष ओम प्रकाश पुनले विज्ञप्ती जारी गर्दै फागुन १३ गते देखि सुकुम्बासीहरुको संघर्षलाई देशव्यापाी बनाउने निर्णय समेत गरेको जानकारी दिनुभएको छ ।
साथै बैठकले सुकुम्बासी जागरण अभियान पनि संचालन गर्ने, सुकुम्बासी समस्या सम्बन्धी व्यापक अन्तरक्रिया , छलफल , गोष्ठीहरू गर्ने, भूमाफियाहरुलाई जनकारबाही गर्ने, लालपुर्जा प्राप्ति र अन्य सेवासुबिधा लगायतको लागि संघर्ष गर्ने निर्णय गरेको छ ।
कैलालीको हरैयालगाएत जिल्लाका विभिन्न ठाउँमा दलालहरुले सुकुम्बासी बसेका जमिन बेचेर घरबारविहीन बनाउने कार्यका बिरुद्ध संघर्ष गर्ने पनि निर्णय भएको बिज्ञप्तीमा जनाईएको छ ।
यस्तै संघले सर्लाहीको सागरनाथ परियोजनाले उठाएको बस्ती फिर्ता गर्न संघर्ष गर्ने, बाराको टाँगिया बस्तीको उचित पुनस्र्थापनाको लागि संघर्ष गर्ने, बर्दिया, बाँके, झापा, सुनसरी, महोत्तरी, पोखरा, कंचनपुर, रुपन्देही, नवलपरासी, चितवन, उपत्यकालगायतका ठाउँमा सुकुम्बासीमाथि भएको ज्यादतीका बिरुद्ध संघर्ष गर्ने भएको छ ।
त्यसको लागि यहि फागुन १३ गते देखि देशब्यापी संघर्षका कार्यक्रम अगाडि बढाईने छ ।
दलाल सत्ता र त्यसले सुकुम्बासीमाथि गर्ने हरेक बिरोधी हर्कतका बिरुद्ध डटेर संघर्ष गर्ने निर्णय गर्दै संघले त्यसमा सहयोग र साथ दिन सम्पूर्ण भूमिहीन सुकुम्बासीहरुलाई आग्रह समेत गरेको छ ।
