कैलाली, माघ २३ । ७ नम्बर प्रदेशकाे प्रदेश सभा माओवादी संसदीय दलको नेतामा त्रिलोचन भट्ट चयन भएका छन् ।
माओवादी सचिवालय सदस्य एवं प्रदेश ईन्चार्ज लेखराज भट्टको उपस्थितिमा बसेको संसदीय दलको बैठकले भट्टलाई संसदीय दलको नेता चयन गरेको हो ।
संसदीय दलको नेता चयन भएसंगै भट्ट मुख्यमन्त्रीको उम्मेदवार बन्ने बाटो खुला भएको छ ।
माओवादीको प्रदेश कमिटीले यसअघि नै मुख्यमन्त्रीको उम्मेदवार डोटीबाट निर्वाचित सांसद भट्टलाई बनाउन पार्टीको केन्द्रीय समितिलाई सिफारिस गरेको थियो ।
माओवादी प्रदेश ईन्चार्ज लेखराज भट्टले त्रिलोचन भट्टलाई पार्टीको संसदीय दलको नेता बनाउने निर्णय संसदीय दलको बैठकले गरेको जानकारी दिनुभयाे ।
बैठकमा संसदीय दलको नेतामा आ–आफ्नो दावी प्रस्तुत गर्ने कैलालीबाट प्रदेश सभा सदस्यमा निर्वाचित बीरमान चौधरी र दार्चुलाबाट निर्वाचित मानबहादुर धामीले उक्त निर्णयप्रति असन्तुष्ति व्यक्त गरेका छन् । बैठकमा आफूहरुको दावीमाथि छलफल नै नभएर एकलौटी रुपमा विधि र प्रकृया विनै निर्णय भएको उनिहरूकाे भनाइ छ ।
