काठमाडौ २२ माघ ।
ललितपुरको ग्वार्कोमा मोटरसाइकल दुर्घटना हुँदा एक जनाको मृत्यु भएको छ । दुर्घटनामा एक जना घाइते भएको प्रहरीले जनाएको छ ।
गएराति बा २९ प ३९९५ नम्बरको मोटरसाइकल डिभाइडरमा ठोक्किएर दुर्घटना हुँदा चालक ओखलढुंगाका प्रेमबहादुर कार्कीको मृत्यु भएको हो ।
दुर्घटनामा परी घाइते भएका कार्कीको उपचारका क्रममा बीएण्डबी अस्पतालमा मृत्यु भएको हो । मोटरसाइकल पछाडि सवार भोजपुरका गणेश तिवारीको भने सोही अस्पतालमा उपचार भैरहेको छ ।
यसैबीच धादिङको गजुरी गाउँपालिका–५ मा सवारी दुर्घटना हुँदा एक जनाको मृत्यु भएको छ । अन्य सातजना घाइते भएका छन् । मृत्यु हुनेमा गोरखाका ४० बर्षीय सुजित श्रेष्ठ रहेका छन् ।
गोरखाबाट काठमाडौंतर्फ आउँदै गरेको बा २ ख ८७९० नम्बरको माइक्रोबसलाई बिपरित दिशाबाट आउँदै गरेको ना ६ ख ६०१९ नम्बरको ट्रकले ठक्कर दिँदा उक्त दुर्घटना भएको प्रहरीले जनाएको छ ।
दुर्घटनामा परी गम्भिर घाइते भएका श्रेष्ठको उपचारका क्रममा गजुरी अस्पतालमा मृत्यु भएको हो । अन्य घाइतेहरुको काठमाडौको ट्रमा सेन्टर उपचार भइरहेको बताइएको छ ।
ठक्कर दिने सवारी साधन र चालकलाई नियन्त्रणमा लिएको ईलाका प्रहरी कार्यालय गजुरी धादिङले जनाएको छ ।
