एजेन्सी, माघ २० । अमेरिकी कंग्रेसले अमेरिकी गुप्तचर निकाय एफबीआईमाथि आफ्नो अधिकारको दुरुपयोग गरेको आरोप लगाइएको एउटा विवादित कागजात सार्वजनिक गरेको छ ।
सो कागजात सन् २०१६ मा भएका अमेरिकी राष्ट्रपति चुनावमा रुसले गरेको हस्तक्षेपबारे राष्ट्रपति डोनाल्ड ट्रम्पको अनुसन्धानसँग सम्बन्धित रहेको छ ।
यो ज्ञापन रिपब्लिकन पार्टीका सांसदले तयार पारेको र गत राष्ट्रपतीय निर्वाचनका अभियानका क्रममा गुप्तचर अनुसन्धानसँग सम्बन्धित रहेको बताइएको छ ।
डेमोक्रेटिक पार्टी यो कागजातलाई सार्वजनिक गर्न रोक्ने पक्षमा छ । डेमोक्रेटिक पार्टीले गुप्त जानकारीमा आधारित यो ज्ञापन सार्वजनिक गरेर ट्रम्पको विरुद्ध जारी अनुसन्धान भड्काउने कोसिस हुने जनाएको छ ।
डेमोक्रेटको विरोधकैबीच कंग्रेसका सभामुख रिपब्लिकन पार्टीका पर्ल रायनले विशेष काउन्सुल रोबर्ट मुलरको नेतृत्वमा भइरहेको अनुसन्धानलाई ज्ञापन सार्वजनिक गर्दा हुने कुनै असर नपर्ने बताएका छन् ।
