चितवन ,माघ १३ ।
स्तरोन्नतीको क्रममा रहेको चितवनको नारायणगढ–मुग्लिन सडकखण्डमा आजदेखि दिउँसो सवारी रोकेर काम गरिने भएको छ ।
यसअघि रातको समयमा सवारी रोकेर काम गरिएको भएपनि प्रभावकारी नभएपछि आजबाट दिउसँसो दैनिक ६ घण्टा सवारी आवागमन बन्द गरेका काम सुरु गर्न लागएको हो ।
बिहान १० बजेबाट दिउँसो ४ बजेसम्म सडक बन्द गरी द्रुत गतिमा काम गरिने नारायणगढ–मुग्लिन सडक आयोजनाका इन्जिनियर शिव खनालले जानकारी दिनुभयो ।
गत पुस १८ गतेदेखि सडक विस्तारको कामलाई तीव्रता दिन राति १० बजेदेखि बिहान ४ बजेसम्म यातायात रोकेर काम गरिँदै आएको थियो ।
रातिको समयमा सवारी रोकिँदा त्यसको असर दिउँसो पर्ने भएकाले सडक स्तरोन्नतीको काम समेत प्रभावित भएको खनालले बताउनुभयो ।
सो सडकखण्डको घुमाउने, १६ किलो र चेपाङ डाँडामा भित्तो काट्ने काम बाँकी छ । १४ दशमलव ७ किलोमिटर सडक कालोपत्रे भएको र हालसम्म ७२ प्रतिशत काम सम्पन्न भएको आयोजनाले दावी गरेको छ ।
जिल्ला ट्राफिक प्रहरी कार्यालय चितवनका अनुसार नारायणगढबाट मुग्लिनतर्फ जाने ट्रकलाई भतेरी र रामनगरमा रोकिनेछ भने बस र साना सवारीलाई जुगेडी र दाशढुंगामा रोकिने छ ।
काठमाडौँबाट नारायणगढतर्फ आउने बस र साना सवारीलाई मुग्लिनमा र ट्रकलाई लेवाटारमा रोकिने छ । पोखरातर्फबाट आउने बस र साना सवारीलाई बेनिटार र ट्रकलाई आँबुखैरनीमा रोकिने जनाईएको छ ।
