८ माघ, दाङ ।
रुकुमबाट दाङको घोराही जाँदै गरेको यात्रुबहाक बस सल्यानको त्रिवेणी–६, भाटखोलामा दुर्घटना हुँदा ४ जनाको मृत्यु भएको छ ।
मृत्यु हुनेमा मुसिकोट नगरपालिका– ६ की पुष्पा खड्का केसी र सल्यान बागचौर नगरपालिका– ११ की छन्चरी विक रहेका छन् । अन्य दुईजना पुरुषको सनाखत हुन सकेको छैन ।
ना ५ ख ५३१ नम्बरको एक यात्रीबहाक बस आज अपरान्ह त्रिवेणी गाउपालिकाको स्थानीय सल्लेखोला भन्ने ठाउँमा दुर्घटना भएको हो । दुर्घटनामा परी अन्य १२ जना गम्भीर घाइते भएको जिल्ला प्रहरी कार्यालय, सल्यानका डिएसपी भरतबहादुर विकले जानकारी दिनुभयो ।
घाइतेहरुको सल्यानका स्थानीय स्वास्थ्य संस्थामा उपचार भइरहेको छ । गम्भीर घाइतेलाई बाँकेको कोहलपुर अस्पताल पठाउने तयारी गरिएको जनाइएको छ ।
बसमा करिब ४० जना यात्री सवार रहेकोमा २० बढी यात्री सामान्य घाइते छन् ।
बस सडकबाट करिब डेढ सय मिटर तल खसेको जनाईएको छ । बस दुर्घटनाको कारण खुलिनसकेको र अनुसन्धान भइरहेको प्रहरीले जनाएको छ ।
