धनकुटा माघ ८, ।
प्रदेश राजधानीको माग गर्दै सुरु भएको आन्दोलनले उग्र रुप लिएपछि धनकुटामा स्थानीय प्रशासनले जारी राखेको निषेधाज्ञा भोलि बिहान ७ बजे सम्मका लागि हटाइएको छ ।
जिल्लाको जनजीवन कष्टकर बन्दै गएकाले र प्रशासनले आज अपरान्ह ३ देखि भोलि बिहान ७ बजे सम्मका लागि निषेधाज्ञा हटाएको जनाएको छ ।
प्रशासन कार्यालयमा आज बसेको बैठकले जिल्ला बन्दका कारण सर्वसाधारणले सास्ती खेप्नु परेको भन्दै निषेधाज्ञा हटाएको प्रमुख जिल्ला अधिकारी प्रेम प्रकाश उप्रेतीले बताउनुभयो ।
प्रदेश राजधानीको माग गर्दै आन्दोलनमा उत्रिएका सर्वसाधारण प्रदेश नम्बर १ को अस्थायी मुकाम विराटनगर तोकिएपछि थप आक्रोशित भएकाले स्थानीय प्रशासनले गत बिहीबार देखि निषेधाज्ञा जारी गरेको थियो ।
यसैबीच प्रदेश राजधानीको माग गर्दै डोटीमा जारी आन्दोलनको स्वरुप फेरिएको छ ।
पाँच दिनदेखि डोटीमा जारी आमहड्ताल स्थगित गरी स्थानीयले आजबाट क्षेत्रीय प्रशासन कार्यालय राजपुरमा धर्ना शुरु गरेको छ ।
प्रदेश राजधानीको माग राख्दै विरोधमा उत्रिएका उनीहरुले आन्दोलनको स्वरुप परिवर्तन गर्दै दुई घण्टा धर्ना तथा दुई घण्टा बजार बन्द गर्ने निर्णय भएको संघर्ष समितिका संयोजक नरेन्द्र खड्काले बताउनुभयो ।
डोटीमा हुन थालेको प्रदेश नम्बर ७ को राष्ट्रिय सभा निर्वाचनलाई सम्पन्न गराउन आम हड्ताल फिर्ता लिइएको संघर्ष समितिले जनाएको छ ।
आन्दोलनको स्वरुप फेरिएपछि आइतबार बेलुकी ५ बजेबाट अवरुद्ध सडक तथा बजार सञ्चालन भएका छन् । यस अघि पनि १३ दिनसम्म जिल्ला ठप्प पारी आन्दोलनको स्वरुप बदल्दै २२ दिनसम्म धर्ना र अनसन गरेर राजधानीको माग गरिएको थियो ।
