एजेन्सी ६ माघ ।
फिलिपिन्सले घरेलु कामदारका रुपमा आफ्ना नागरिकलाई कुवेत जान रोक लगाएको छ । पछिल्लो समय कुवेतमा कामका लागि गएका आफ्ना नागरिकको मृत्युको घटना बढेपछि छानबिनका लागि भन्दै फिलिपिन्स सरकारले सो रोक लगाएको हो ।
कुवेतमा घरेलु श्रमिकको रुपमा रहेका फिलिपिनोले त्यहाँ भोग्नु परेको अपमान र र्दुव्यवहारकै कारण आत्महत्याको घटनामा वृद्धि भएपछि फिलिपिन्स सरकारले पछिल्लो कदम चालेको राष्ट्रपति रोड्रिगो ड्युट्रेटलाई उदृत गर्दै बीबीसीले जनाएको छ ।
राष्ट्रपति ड्युट्रेटले महिला श्रमिकहरुले विदेशमा भोग्नुपरेको यौनर्दुव्यवहारप्रति पनि सचेत हुनपर्ने बताउनु भएको छ । फिलिपिन्सको पछिल्लो कदमप्रति कुवेतले फिलिपिन्सका सरकारी अधिकारीसँग सो विषयमा छलफल गर्ने जनाएको छ ।
यहि महिनाको सुरुमा कुवेतमा एक महिलाले आत्महत्या गरेपछि उनका परिवारले यौन र्दुव्यवहारकै कारण उनले आत्महत्या गरेको हुनसक्ने दावी गरेका थिए । उक्र घटनापछि फिलिपिन्स सरकारले छानबिन प्रक्रिया अघि बढाएको जनाएको छ ।
फिलिपिन्सका २३ लाख बढी नागरिक विदेशमा रहेको तथ्याङ्क छ । तीमध्ये अधिकांश खाडी मुलुक, यूएई, साउदी अरब कतार र कुवेतमा छन् । कुवेतमा मात्रै २ लाख ५० हजार फिलिपिनो रहेका छन् जसमध्ये अधिकांश घरेलु कामदार छन् ।
