डोल्पा, १ माघ । नेपाली सेनाले निर्माणको जिम्मा पाएको दुर्गम हिमाली जिल्ला डोल्पाको दुनै छिट्टै राष्ट्रिय सडक सञ्जालमा जोडिने भएको छ ।
जाजरकोट–डोल्पा सडकखण्डअन्तर्गत श्रीविण्डे–त्रिपुराकोट खण्डको निर्माण कार्य तीन किमी मात्रै बाँकी रहेको जानकारी दिदैँ सेनाले तीव्र गतिमा काम भईरहेको बताएको छ ।
जाजरकोट–डोल्पा सडकखण्डको कुल लम्बाइ ११७ दशमलव ७ किमी सडकखण्डमध्ये ११४ दशमलव ७ किमी सडक सेनाले निर्माण कार्य पूरा गरिसकेको छ ।
डोल्पाको दुनैसम्म सडक जोड्नका लागि श्रीविण्डे–त्रिपुराकोट खण्डको तीन किमी मात्रै निर्माण कार्य बा“की रहेको जाजरकोट–डोल्पा सडक निर्माण कार्यदलका प्रमुख कर्णेल विश्वबन्धु पहाडीले बताउनुभयो ।
उक्त खण्डमा भिर पहरायुक्त भएकाले निर्माण कार्यमा भने चुनौती रहेको उहाँले बताउनु भयो ।
माघ दोस्रो साताभित्रै रुकुम–डोल्पा सिमानामा पर्ने त्रिवेणी बजारदेखि त्रिपुरासुन्दरी नगरपालिकाको श्रीविण्डेसम्मको सडकखण्ड उद्घाटन गर्ने तयारीमा रहेको पनि पहाडिले जानकारी दिनुभयो ।
उद्घाटन लगत्तै जिप, ट्र्याक्टरलगायतका हलुका यातायातका साधन सञ्चालन सुरु गरिने जनाईएको छ ।
जाजरकोट–डोल्पा सडकखण्डको रुकुम डोल्पा सिमानामा पर्ने त्रिवेणी बजारसम्म गत ०७३ सालमा प्रधान सेनापति राजेन्द्र क्षेत्रीद्वारा उद्घाटन गरेर यातायात सञ्चालनमा ल्याइएको थियो ।
गोतामकोटदेखि त्रिवेणीसम्म यातायात सञ्चालनमा ल्याइएपछि तल्लो डोल्पाका जनता प्रत्यक्ष लाभान्वित भएका छन् भने दैनिक उपभोग्य वस्तु ढुवानीमा समेत सहज भएको मुड्केचुला गाउँपालिकाका स्थानीयवासी सरोज थाले बताउनुभयो ।फोटो : गुगल
