संखुवासभा, पुस ३० ।
संखुवासभाको भोटखोला गाउँपालिकाको हटियामा पर्ने बरुण दोभानतर्फ गएको जीप दुर्घटना हुँदा मृत्यु भएका ६ जनाको सनाखत भएको प्रहरीले जनाएको छ ।
दुर्घटनामा मकालु गाउँपालिकाका अध्यक्ष खड्गबहादुर कटुवालसहित ६ जनाको मृत्यु भएको हो ।
दुर्घटनामा समाजशास्त्री अर्जुन बस्नेत, इन्जिनीयर सुदीप ढकाल, जिल्ला समन्वय समितिका सूचना अधिकृत सुभाषचन्द्र कुइकेल, पाथीभरा हेदांनाका सुरेश राई र जीप चालकको घटनास्थलमा मृत्यु भएको प्रहरी निरीक्षक बेदप्रसाद गौतमले बताउनुभयो ।
दुर्घटनामा परेका सबैजनाको शव क्षतविक्षत अवस्थामा रहेको प्रहरीले जनाएको छ । प्रमुख जिल्ला अधिकारी शिवराज जोशीका अनुसार सदरमुकाम खाँदबारीबाट गएको बा ५ च १३०९ नम्बरको जीप मकालु गाउँपालिका–३, मा पर्नेे सामाटार भन्ने स्थानमा आज दिउँसो १२ बजे दुर्घटना भएको थियो ।
घटनास्थल निक्कै भीरालो भएकाले घटना भएको ४ घण्टापछि शव निकालिएको प्रहरीले जनाएको छ । जीप स्थानीय विकास मन्त्रालय अन्तर्गत केन्द्रीय आयोजना कार्यान्वयन इकाइको रहेको प्रजिअ जोशीले बताउनुभयो ।
जीप सडकबाट करिब ३ सय मिटर तल झरेको छ । घटनास्थल सदरमुकाम खाँदबारीबाट कम्तिमा ७० किलोमिटर उत्तरमा पर्छ । जीप कसरी दुर्घटना भयो भन्ने विषयमा कुनै जानकारी नपाएको प्रहरीले जनाएको छ ।
