काठमाडौ, २६ पौष ।
अदालतको अवहेलना अभियोगमा गिरफ्तार भएका डा. गोविन्द केसीको मुद्दामा आज सुनुवाई हुँदैछ । हिजो नै सुनुवाई हुने कार्यतालिका रहेपनि बयान लिँदालिँदै समय सकिएपछि सुनुवाइ आजका लागि सारिएको हो ।
अहिले निवेदकका तर्फबाट अधिवक्त प्रकास केसीले बहस गरिरहनु भएको छ । यसअघि बिहान अनशनरत केसीलाई वीर अस्पतालबाट प्रहरीको एम्बुलेन्समा राखेर सर्बोच्च अदालत लगिएको थियो ।
डा. केसीलाई स्वास्थ्यमा समस्या देखिएपछि हिजै बीर अस्पतालमा भर्ना गरिएको थियो । उहाँको मांसपेशी बाउडिने तथा मुटुको धड्कनमा वृद्धि हुनुका साथै अनशनका कारण स्वास्थ्यमा समस्या देखिएको चिकित्सकले बताएका छन् ।
केसीको पक्षमा सयजना भन्दा बढी वकिलले बहस गर्न वकालतनामा गराएका छन् । वरिष्ठ अधिवक्ता कृष्णप्रसाद भण्डारी, अधिवक्ताहरु सुरेन्द्र भण्डारी, ओमप्रकाश अर्याल, विजयप्रसाद मिश्र, इन्दु तुलाधर, दिनेश त्रिपाठी लगायत झण्डै सयजना वकिलले केसीको पक्षमा बहस गर्ने भएका हुन् ।
सर्वोच्च अदालतको आदेशमा सोमबार बेलुकी पक्राउ परेका डा. केसीले हिरासतमै अनशनलाई निरन्तरता दिनुभएको छ । केसीले माग पूरा नभएसम्म अनसन नछोड्ने अडान राख्नुभएको छ ।
आइओएमका डीन शशि शर्मालाई पुनर्बहाली गराउने सर्वोच्च अदालतको फैसलाको विरोधमा प्रधानन्यायाधीश गोपालप्रसाद पराजुलीको राजीनामा लगायत माग राखेर उहाँले सोमबार १४ औँ अनशन सुरु गर्नु भएको हो ।
