काठमाडौं ,पुस १५ । महिला हिंसा पीडितको उजुरी दर्ता गर्न राष्ट्रिय महिला आयोगले सञ्चालनमा ल्याएको ११४५ खबर गरौं हेल्पलाइन सेवा प्रभावकारी हुँदै गएको छ ।
न्यायमा महिलाको पहुँच बढाउन र महिला हिंसाका घटनामा कमी ल्याउन यस्तो सेवा शुरु गरिएको हो ।
पीडित, हिंसा हुन लागेको अवस्था वा अधिकारबाट वञ्चित गराइएका महिलाले ११४५ मा फोन गरी उजुरी दर्ता निस्शुल्क रुपमा गर्न सक्छन् ।
६० वटा उजुरी दर्ता महिला हिंसाका उजुरी लिखित रुपमा लिने राष्ट्रिय महिला आयोगले हाल टेलिफोन मार्फत् त्यस्ता उजुरी दर्ता शुरु गरेको छ ।
विश्व बैंकको सहयोगमा आयोगले गत मंसिर २४ गते ११४५ खबर गरौं हेल्प लाइन सेवा शुरु गरेको हो ।
सेवा शुरु भएको आधा महिनाको अवधिमा आएका ५ हजार ७ सय ८० वटा कलबाट ६० उजुरी दर्ता भएको आयोगका सचिव तुलसीराम सेढाईले बताउनु भयो ।
अधिकांश उजुरी घरेलु हिंसा, साइबर क्राइमसँग सम्बन्धित रहेको आयोगले जनाएको छ । समस्या समाधान नभएसम्म सहयोग दर्ता भएका उजुरीमध्ये केही मिलापत्र मार्फत् टुङ्गिएको र अन्य कानूनी प्रक्रियामा रहेको लैङ्गिक हिंसा न्यूनीकरण तथा रोकथामका लागि एकीकृत परियोजना सम्बोधनका प्रोजेक्ट म्यानेजर पलिता थापाले जानकारी दिनुभयो ।
उजुरी दर्तापछि आयोगले पीडितलाई परामर्श, निस्शुल्क कानूनी सहायता र समस्या समाधान नभएसम्म सहयोग गर्छ ।
काठमाडौं, भक्तपुर, ललितपुर र नुवाकोटमा हाल पाइलट प्रोजेक्टको रुपमा यो सेवा शुरु भएपनि झापा, कञ्चनपुर, सर्लाहीबाट समेत उजुरी आउने गरेको आयोगले जनाएको छ ।
महिला हिंसाका घटनामा कमी ल्याउन र न्यायमा महिलाको पहुँच बढाउन यो हेल्पलाईन सहयोगी हुने अपेक्षा आयोगको छ ।
