काठमाडौ १५ पौष ।
बहुप्रतिक्षित मेलम्ची खानेपानी आयोजना अन्तर्गत अम्बाथान–ग्याल्थुम सुरुङ खण्डको ब्रेक–थ्रु भएको छ । ८ दशमलव २ किलोमिटरको सो खण्डको गएराति ब्रेक थ्रु भएको आयोजना प्रमुख रामचन्द्र देवकोटाले जानकारी दिनुभयो ।
ब्रेक थ्रु बारे औपचारिक जानकारी गराउन आज दिउँसो १ बजे विशेष कार्यक्रमको आयोजना गरिएको आयोजनाले जनाएको छ । कार्यक्रममा शहरी विकास राज्यमन्त्री कुन्ती शाही, मन्त्रालयका सचिव–सहसचिव, एसियाली विकास बैंकका प्रतिनिधि, स्थानीय अधिकारी लगायतको उपस्थिती रहनेछ ।
आयोजनाले गरेको यो दोश्रो ब्रेक थ्रु हो । यो सँगै अब मेलम्ची आयोजनाको सुरुङ अन्तर्गत ग्याल्थुम–सिन्धु सुरुङ मात्रै ब्रेक थ्रु गर्न बाँकी रहेको छ । सो खण्ड अन्तर्गत करीब ५ सय मिटर खन्न बाँकी रहेको र आगामी जनवरी भित्रै त्यसको पनि ब्रेक थ्रु गर्नेगरी काम अघि बढिररहेको आयोजनाले जनाएको छ ।
मेलम्चीको पानी सुन्दरीजल प्रशोधन केन्द्रमा ल्याइ प्रशोधनपछि मात्रै वितरण गर्ने योजना अनुसार अहिले प्रशोधन केन्द्रको परीक्षण भइरहेको छ । सेप्टेम्बर २०१३ सम्म काम सक्ने गरी सन् २००९ मा सुरुङको ठेक्का लिएको चाइना रेल्वेको काममा ढिलासुस्ती भएको भन्दै सन् २०१२ मा सम्झौता तोडिएको थियो ।
सो यता सुरुङ निर्माणको काम इटालीयन कम्पनी अपरेटिभ मुरातोरी एन्ड केमेन्टेस्टी सीएमसीले गरिरहेको छ । पटक– पटक म्याद थप गर्दै आएको आयोजनाले २०७४ सालको नयाँ वर्षको सुरुवातमै काठमाण्डौं उपत्यकाबासीको घरघरमा मलेम्चीको पानी र्पुयाइसक्ने दावी गर्दै आएको छ ।
