काठमाडौं । पार्टी अध्यक्ष नपाएसम्म नेकपा माओवादी केन्द्रले एमालेसँग पार्टी एकता नगर्ने भएको छ । धेरै सिट जितेको हिसावले प्रधानमन्त्रीमा एमाले अध्यक्ष केपी ओलीलाई निशर्त स्विकार गर्ने बताएको माओवादीले पार्टी अध्यक्षपनि छोडेर एकता नगर्ने बताएको हो ।
माओवादी केन्द्रीय कार्यालयको बिहिबारको बैठकमा बोल्ने सबै नेताहरुले पार्टी एकताका लागि माओवादीले अध्यक्ष पाउनुपर्ने कुरा बटमलाईन बनाएर जानुपर्ने धारणा राखेका हुन् ।
बर्तमान राजनीतिका विभिन्न विषयमा भैरहेका छलफलबारे अध्यक्ष प्रचण्डले बैठकमा ब्रिफीङ गरेको एक नेताले जानकारी दिए । एमालेका तर्फबाट सरकार बनाउन हतार गरेको तर पार्टी एकताका लागि आवश्यक तयारी र लचकता नदेखाएको आशंका पनि माओवादीका नेताहरुले गरेका छन् ।
माओवादीले सातै प्रदेशका माओवादी तर्फका समानुपातिक सांसदहरुको समेत टुंगो लगाएको छ । पार्टीका तर्फबाट टुंगिएको नामवली निर्वाचन आयोगमा बुझाउने माओवादी केन्द्रको तयारी छ ।
