१२ पुस,काठमाडौं । कलाकार विना थापाको मृत्यु भएको छ । बुधबार काठमाडौंको बत्तीसपुतलीमा ट्याङ्करले भएको दुर्घटनामा कलाकार विना थापाको मृत्यु भएको हो।
बा ५५ प १३८७ नम्बरको स्कुटरमा सवार थापालाई बा २ ख ८९४ नम्बरको पानी ट्याङकरले बुधबार ठक्कर दिँदा गम्भीर घाइते भएकी थापाको उचारको क्रममा मृत्यु भएको हो । गुल्मीको मुसिकोट गाउँपालिका–२ स्थायी घर भएकी २७ बर्षीया थापा हाल काठमाडौंको धापासीमा बस्दै अाएकी थिइन् ।
दुर्घटनामा गम्भीर घाइते भएकी उनको वीर अस्पतालमा उपचारको क्रममा मृत्यु भएको प्रहरीले जनाएकोछ । उक्त ट्याङकर र चालकलाई प्रहरीले नियन्त्रणमा लिएको छ।
नवनायीका थापाले केही पहिले फेसबुकमा लेखेकी थिइन-”जिन्दगी के रहिछ त ? मानवीय घमण्ड आखिर किन ? यस्तै कुराले मलाई पिरोल्छ धेरैजसो पशुपतीनाथ को दर्शन अनि त्यहाँ को माहोल मा टोलाइरहन मन लाग्छ ।
त्यहाँ को गतिविधि हेर्नको लागि म प्राय पशुपति जाने गर्छु आफुलाइ फ्रेस बनाउन र केही बुझ्न, त्यहाँ बस्दा समय बितेको पत्तो पाउँदैन ।
मृत्यु भयानक छ तर इमान्दार छ । मानिसको इमान्दार मित्र कोही छ भने त्यो मृत्यु हो । मृत्युले कहिले धोका दिँदैन । जन्मदेखिसँगै बस्ने र जाँदा सँगै लिएर जाने मृत्यु रहेछ । मृत्युको आफ्नै लय हुन्छ जीवनको लय भन्दा फरक छ । मृत्यु सधै दुखदायी हुन्छ तर दुःखको कारण मृत्यु होइन त्यो प्रेम हो ।”
