काठमाण्डु, १० पुस ।
ऐतिहासिक रानीपोखरीको पुनर्निर्माणबारे काठमाडौँ महानगरपालिकाको मेयर र उपमेयर नै आरोप प्रत्यारोपमा उत्रिएका छन् । मेयर विद्यासुन्दर शाक्यले पुरातत्व विभागबाट स्वीकृत डिजाइनअनुसार नै रानीपोखरीको पुनःनिर्माण भइरहेको बताइरहँदा उपमेयर हरिप्रभा खड्गीले पुनर्निर्माण रोक्न आफूले कदम चाल्ने बताएकी छन् ।
मेयर शाक्यले रानीपोखरी पुनर्निर्माणमा अनावाश्यक विवाद झिकिएको जिकिर गर्दै सम्पदा नमासिने गरी काम भइरहेको दाबी गरे । ‘सम्पदा सबैको साझा सम्पत्ति हो त्यसैले अनावश्यक विवाद झिकेर पुनःनिर्माण समस्या नल्याउनुस्’, उनले भनेका छन्, ‘रानीपोखरी पुनःनिर्माणको आयोजना म निर्वाचित हुनुभन्दाअघिकै हो । सम्पदा नमासिने गरी छिटो काम सक्न निर्देशन दिइसकेको छु ।’
उता उपमेयर खड्गीले भने मेयरको भनाईसँग बाझिने गरी आफ्नो धारणा बाहिर ल्याएकी छन् । राजधानीमा आयोजित एक कार्यक्रममा बोल्दै खड्गीले रानीपोखरीको पुनर्निर्माण नै रोक्न पहल गर्ने बताइन् ।
‘रानीपोखरीको पुनःनिर्माण कार्यलाई रोक्ने कार्यमा सहयोग गर्छु’, उनले भनिन्, ‘विवादस्पद रुपमा सम्पदा मास्ने गरी भइरहेको यस्तो कामले सबैलाई चिन्तित बनाएको छ ।’
तर अर्कातिर मेयर शाक्यले भने पुरातत्व विभागकै स्वीकृतिमा निर्माण भइरहेको जिकिर गरे । ‘पुरातत्व विभाग, पुनःनिर्माण प्राधिकरण र महानगरको सहमतिमै राष्ट्रपतिज्यूले रानीपोखरी पुनःनिर्माणको शिलान्यास गर्नुभएको हो’, मेयर शाक्यले भनेका छन्, ‘यो योजना पहिलाकै भएकाले डिजाइन हो । सामान्य हेरफेर गरेर पहिलाकै स्वरुपमा पुनःनिर्माण गर्न निर्देशन दिएको छु ।’
शाक्यले रानीपोखरीमा वाटर फाउण्टेन राख्ने योजना पनि सुनाए । ‘यो पोखरीलाई रमणीय र सुन्दर पार्कका रुपमा संरक्षण र विकास गर्छौं’, शाक्यले भने, ‘सकेसम्म पोखरी बीचको बाटोलाई पनि वैकल्पिक बनाएर रानीपोखरीको क्षेत्रलाई रत्नपार्कसम्म जोड्ने योजना छ ।’
त्यसैगरी सोमबारै भएको एक कार्यक्रमका वक्ताहरुले रानीपोखरीको पुनःनिर्माण पुरानै शैलीमा गर्नुपर्नेमा जोड दिएका छन् । त्यस अवसरमा रक्षामन्त्री भीमसेनदास प्रधानले मल्लकालीन इतिहाससंग जोडिएको रानीपोखरीजस्ता सम्पदालाई कसैले चाहेर पनि मास्न नसक्ने बताए ।
